राजकारण तापलं! भाजपमधील कुणालाही न सांगता राणे थेट राज्यपालांच्या भेटीला

पणजी : गोव्यात भाजपने पुन्हा सत्ता ताब्यात राखण्यात यश मिळवले आहे. असे असले तरी मुख्यमंत्रिपदाचा तिढा पक्षासमोर निर्माण झाला आहे. यामुळे मुख्यमंत्री प्रमोद सावंत यांनी आज राज्यपालांना भेटून राजीनामा दिला आहे. त्यामुळे आता मुख्यमंत्रिपदाची माळ कुणाच्या गळ्यात मिळणार याची उत्सुकता ताणली गेली आहे. यातच भाजप नेते विश्वजित राणे यांनी आज थेट राज्यपालांची भेट घेतली. यामुळे तर्कवितर्कांना उधाण आले आहे.

गोव्यात (Goa) विधानसभेच्या ४० पैकी २० जागा भाजपला (BJP) मिळाल्या आहेत. महाराष्ट्रवादी गोमंतक पक्ष आणि तीन अपक्षांनी भाजपला पाठिंबा दिला आहे. यामुळे भाजपने गोव्यात बहुमताचा आकडा गाठला आहे. असे असताना मुख्यमंत्रिपदावरून गटबाजी उफाळली आहे. विश्वजित राणे (Vishwajit Rane) हे आरोग्यमंत्री होते. राणे यांच्यासोबत त्यांच्या पत्नीही विधानसभा निवडणुकीत निवडून आल्या आहेत. सावंत यांनी आज मुख्यमंत्रिपदाचा राजीनामा राज्यपालांकडे सोपवला. यानंतर काही वेळाने राणे हे थेट राज्यपालांना जाऊन भेटले. ही भेट व्यक्तिगत स्वरूपाची असल्याचे त्यांनी म्हटले आहे. दरम्यान, या भेटीबद्दल भाजप नेत्यांना काहीही माहिती नव्हती.

राणे हे मुख्यमंत्रिपदाचे दावेदावर मानले जात आहेत. आजच्या त्यांच्या राज्यपालांच्या भेटीने सगळ्यांच्याच भुवया उंचावल्या आहेत. यामुळे गोव्यातील राजकारणात अनपेक्षित गोष्टी घडण्याची शक्यता व्यक्त होत आहे. प्रमोद सावंत (Pramod Sawant) यांना बदलण्याच्या चर्चेमागे त्यांचा निसटता विजयही कारणीभूत आहे. साखळी मतदारसंघातून सावंत यांचा केवळ ६६६ मतांनी विजय झाला आहे. सावंत यांच्या खराब कामगिरीमुळे पक्षांतर्गत विरोधकांनी त्यांच्या विरोधात मोहीम उघडली आहे. त्यामुळे सावंतांची विकेट पडून मुख्यमंत्रिपदासाठी दुसरे नाव पुढे केले जाण्याची शक्यता आहे.

राणेंचे सूचक वक्तव्य

भाजप नेते आणि आरोग्यमंत्री विश्वजित राणे यांची नाराजी निकालानंतर समोर आली होती. त्यांनी मुख्यमंत्रिपदासाठी प्रमोद सावंत यांना थेट पाठिंबा देण्याविषयीच्या प्रश्नावर बोलणं टाळलं होतं. राणे यांना गोव्याचा पुढील मुख्यमंत्री कोण असणार हा प्रश्न विचारण्यात आला होता. त्यावर उत्तर देताना ते म्हणाले होते की, हा संवेदनशील प्रश्न आहे. त्यामुळे मी आत्ता काहीही बोलणार नाही.

दरम्यान, गोव्याच्या मुख्यमंत्री पदावर असताना मनोहर पर्रीकर यांचे निधन झाले होते. त्यावेळी राणेंचे नाव मुख्यमंत्रिपदाच्या शर्यतीत होते. मात्र, त्यावेळी राणे यांना थांबवून प्रमोद सावंत यांना संधी देण्यात आली होती. त्यानंतरच्या काळात सरकारचा गाडा हाकताना दोघांमधील मतभेद सातत्याने बाहेर येत होते. गोव्यात आता भाजपला अन्य अपक्ष आमदारांनी पाठिंबा दिला आहे. त्यामुळे भाजप बहुमत सिद्ध करून सत्तास्थापनेचा दावा करणार हे स्पष्ट आहे, मात्र त्यापूर्वी भाजपला अंतर्गत गटबाजीचा सामना करावा लागू शकतो.

फडणवीसांचं मौन

मुख्यमंत्री कोण होणार या प्रश्नावर गोवा प्रभारी देवेंद्र फडणवीस यांनीही उत्तर देणं टाळलं आहे. एका वृत्तवाहिनीशी बोलताना फडणवीस म्हणाले आहेत की, निकालानंतर भाजपच्या संसदीय मंडळाची बैठक होतं असते. त्यानंतर निरीक्षक राज्यांमध्ये जाऊन विजयी आमदारांशी आणि जेष्ठ्य पदाधिकाऱ्यांशी चर्चा करतात. त्यानंतर नाव घोषित केले जाते. गोव्यातही हीच प्रक्रिया पूर्ण होईल, त्यानंतरच मुख्यमंत्रिपदाच्या नावाची घोषणा होईल.