Citizenship Amendment Act : देशात लागू होणार CAA? पंतप्रधान मोदी करणार मोठी घोषणा...

New Delhi News : बहुचर्चित नागरिकता दुरुस्ती कायदा (CAA) आज मध्यरात्रीपासून देशात लागू होण्याची शक्यता आहे. याबाबतचे नोटिफिकेशन केंद्र सरकारडून जारी केले जाऊ शकते. त्याआधी थोड्याच वेळात पंतप्रधान नरेंद्र मोदी जनतेशी संवाद साधणार असून, त्यामध्ये ‘सीएए’बाबत घोषणा करण्याची शक्यता आहे.

केंद्रीय गृहमंत्री अमित शाह यांनी काही दिवसांपूर्वीच सीएएच्या अंमलबजावणीबाबत संकेत दिले होते. लोकसभा निवडणुकीआधी या कायद्याची अंमलबजावणी केली जाईल, असे संकेत मिळत होते. त्यानुसार आजच सरकारकडून याबाबतचे नोटिफिकेशन काढले जाणार असल्याची माहिती समोर आली आहे.

पंतप्रधान मोदी जनतेशी संवाद साधताना याबाबत घोषणा करतील, अशीही चर्चा आहे. लोकसभा आणि राज्यसभेत हा कायदा मंजूर होऊन तीन वर्षे लोटली आहेत, पण कायद्यातील काही तरतुदींमुळे वाद निर्माण झाला. त्यामुळे त्याची अंमलबजावणी रखडली होती. अखेर लोकसभा निवडणुकीच्या तोंडावर सरकारकडून कायदा लागू केला जाणार असल्याची शक्यता आहे.

काय आहे कायदा?

सीएए कायद्यात पाकिस्तान, बांगलादेश आणि अफगाणिस्तान येथील धार्मिक अल्पसंख्याकांच्या भारतात पुनर्वसनाचा म्हणजेच त्यांना नागरिकता देण्याचा मुख्य उद्देश आहे. या तिन्ही देशांमध्ये धार्मिक अल्पसंख्याक म्हणजे प्रामुख्याने हिंदू आणि शीख नागरिकांवर अत्याचार होतात. त्यातून गेल्या 75 वर्षांत लाखो नागरिकांनी भारतात आश्रय घेतला आहे. या निर्वासितांना भारताचे कायदेशीर नागरिकत्व देण्याची तरतूद या कायद्यात आहे.

का होतोय विरोध?

सीएए कायद्याला विरोध करणाऱ्यांच्या मते बांगलादेशातून, अफगाणिस्तानातून अनेक मुसलमान नागरिकांनीही भारतात आश्रय घेतला आहे, त्यांना भारतीय नागरिकत्व देण्याच्या संबंधात या कायद्यात काहीही नाही. शिवाय जे नागरिकत्व नोंदणी रजिस्टर अमलात येणार आहे. त्यामुळे तर मुसलमानांना या देशातून बाहेर काढणे किंवा हद्दपार करणे हा मोदी सरकारचा डाव असल्याची टीका केली जात आहे.

R