DA hike Latest News : केंद्रीय कर्मचाऱ्यांच्या खात्यात आता 'एक्स्ट्रा' पैसे! 2 टक्के डीए वाढीवर शिक्कामोर्तब; अक्षय्य तृतीयेचं खास गिफ्ट!

केंद्रीय सरकारी कर्मचाऱ्यांसाठी यंदाची अक्षय्य तृतीया खास ठरली आहे. केंद्र सरकारने महागाई भत्त्यात 2 टक्क्यांची वाढ जाहीर करत कर्मचाऱ्यांना मोठा दिलासा दिला आहे. या निर्णयामुळे सध्याचा महागाई भत्ता 58 टक्क्यांवरून थेट 60 टक्क्यांपर्यंत वाढणार आहे. देशातील सुमारे 5 दशलक्ष कर्मचारी आणि 6.5 दशलक्ष निवृत्तीवेतनधारकांना या निर्णयाचा थेट फायदा होणार आहे.

महागाई वाढत असताना कर्मचाऱ्यांच्या खर्चातही सातत्याने वाढ होत आहे. त्यामुळे महागाई भत्ता वाढवण्याची मागणी गेल्या काही महिन्यांपासून होत होती. अखेर केंद्रीय मंत्रिमंडळाने यावर शिक्कामोर्तब करत कर्मचाऱ्यांना आर्थिक दिलासा दिला. जानेवारीपासून लागू होणारी ही वाढ यावेळी थोड्या उशिराने जाहीर झाली असली, तरी एप्रिल महिन्यात हा निर्णय झाल्याने कर्मचाऱ्यांना एकप्रकारे सणाची भेट मिळाली आहे.

निवृत्तीवेतनधारकांनाही या निर्णयाचा फायदा होणार असून त्यांना महागाई सवलत म्हणजेच डीआरमध्ये वाढ मिळेल. त्यामुळे त्यांच्या मासिक उत्पन्नात वाढ होऊन वाढत्या महागाईचा ताण काही प्रमाणात कमी होईल.

याशिवाय केंद्र सरकारने आणखी काही महत्त्वाचे निर्णय घेतले आहेत. भारतीय जहाजांना स्वस्त आणि सुरक्षित विमा सुविधा उपलब्ध व्हावी यासाठी 13000 कोटी रुपयांच्या निधीसह सार्वभौम सागरी निधीला मंजुरी देण्यात आली आहे. तसेच ग्रामीण भागातील रस्ते विकासाला चालना देण्यासाठी प्रधानमंत्री ग्राम सडक योजना 2028 पर्यंत वाढवण्यात आली असून यासाठी 3000 कोटी रुपयांची अतिरिक्त तरतूद करण्यात आली आहे.

दरम्यान, आठव्या वेतन आयोगाच्या पार्श्वभूमीवर कर्मचारी संघटनांनी विविध मागण्या मांडल्या आहेत. वेतन रचनेत बदल करून फिटमेंट फॅक्टर 3.83 ठेवण्याची मागणी करण्यात आली आहे. ही मागणी मान्य झाल्यास किमान मूळ वेतन 18000 रुपयांवरून सुमारे 69000 रुपयांपर्यंत जाऊ शकते.