Tata Sons chairman dispute : टाटा सन्सच्या कार्यकारी अध्यक्षपदाच्या फेरनियुक्तीवरून सुरू असलेल्या वादात काँग्रेस नेते आणि लोकसभेतील विरोधी पक्षनेते राहुल गांधी यांनी उडी घेतली आहे. टाटा समूहाला जाणीवपूर्वक उद्ध्वस्त केले जात असल्याचा आरोप करत त्यांनी पंतप्रधान नरेंद्र मोदी आणि केंद्रीय गृहमंत्री अमित शाह यांच्यावर निशाणा साधला आहे.
तसेच, सरकारच्या कथित दबावाविरोधात उद्योगजगतातील बडे व्यावसायिक आवाज उठवत नसल्याबद्दलही त्यांनी प्रश्न उपस्थित केला आहे.
राहुल गांधी (Rahul Gandhi) यांनी सोशल मीडिया प्लॅटफॉर्म एक्सवर केलेल्या पोस्टमध्ये म्हटले आहे की, ‘टाटा समूहाला जाणीवपूर्वक गुन्हेगारी पद्धतीने उद्ध्वस्त केले जात आहे; मात्र कोणताही उद्योगपती याविरोधात एक शब्दही बोलण्याचे धाडस करत नाही.’
‘तुम्ही आणखी किती काळ गप्प बसणार? ते तुमच्यावरही मालकी हक्क गाजवतील, तोपर्यंत?’ असा सवालही त्यांनी उद्योगपतींना केला आहे. भारतीय उद्योगजगत हे पंतप्रधान नरेंद्र मोदी (Narendra Modi) आणि अमित शाह यांच्या हातातील खेळणे नसल्याचे सांगत, ‘तुमच्यात धाडस नाही; पण आमच्यात आहे. या गुन्ह्यांबद्दल न्याय मिळवून देण्यासाठी आम्ही सर्वतोपरी प्रयत्न करू,’ असा इशाराही राहुल गांधी यांनी दिला आहे.
देशातील मोठ्या कॉर्पोरेट कंपन्यांचे प्रमुख आणि व्यावसायिक दिग्गज सरकारच्या कथित दबावामुळे उघडपणे भूमिका मांडण्यास घाबरत असल्याचा आरोप राहुल गांधी यांनी केला आहे. टाटा समूहाशी संबंधित घडामोडींच्या पार्श्वभूमीवर त्यांनी उद्योगजगताच्या मौनावर प्रश्नचिन्ह उपस्थित केले आहे.
दरम्यान, टाटा सन्सच्या कार्यकारी अध्यक्षपदाच्या फेरनियुक्ती प्रक्रियेवरून टाटा समूहातही मतभेद समोर आले आहेत. टाटा न्यासांचे अध्यक्ष नोएल टाटा यांनी एन. चंद्रशेखरन यांच्या फेरनियुक्तीच्या प्रक्रियेवर गंभीर आक्षेप घेतल्याचे वृत्त आहे. या प्रक्रियेत कायदेशीर आणि प्रक्रियात्मक त्रुटी असल्याचा त्यांचा दावा असून, फेरनियुक्तीचा ठराव कायदेशीरदृष्ट्या अवैध असल्याची भूमिका त्यांनी मांडल्याचे सांगितले जात आहे.
यापूर्वीही राहुल गांधी आणि विरोधकांनी टाटा समूहाची माहिती-तंत्रज्ञान क्षेत्रातील कंपनी टाटा कन्सल्टन्सी सर्व्हिसेस (TCS) आणि केंद्रीय निवडणूक आयोग यांच्या संबंधांवरून केंद्र सरकारवर टीका केली होती. नवीन मतदार नोंदणीसाठी वापरल्या जाणाऱ्या ऑनलाइन 'फॉर्म 6'मध्ये करण्यात आलेल्या तांत्रिक बदलांवरून विरोधकांनी प्रश्न उपस्थित केले होते. या बदलांची जबाबदारी कोणाची होती आणि ते कोणाच्या निर्देशानुसार करण्यात आले, याबाबत राहुल गांधी यांनी स्पष्टीकरणाची मागणी केली होती.
तसेच, TCSवर निवडणूक आयोगाचा दबाव होता का आणि कंपनीला मिळालेल्या कंत्राटांचा राजकीय निधीशी काही संबंध होता का, असे प्रश्नही विरोधकांकडून उपस्थित करण्यात आले होते. कंपनीच्या निवडणूक निधीतील सुमारे 83 टक्के हिस्सा भाजपला मिळाल्याचा दावा करत या व्यवहारांबाबत संशय व्यक्त करण्यात आला होता. मात्र, या आरोपांवरून कोणताही निष्कर्ष काढण्यासाठी संबंधित व्यवहार आणि कंत्राटांबाबतची अधिकृत माहिती तपासणे आवश्यक आहे. टाटा सन्समधील नेतृत्वाच्या फेरनियुक्तीवरून सुरू झालेला वाद, नोएल टाटा यांनी घेतलेली आक्षेपाची भूमिका आणि राहुल गांधी यांनी केंद्र सरकारवर केलेले आरोप यामुळे हा विषय आता कॉर्पोरेट क्षेत्रासोबतच राजकीय चर्चेचाही केंद्रबिंदू ठरला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.