CM Politics : शिवकुमारांनी जे पेरलं तेच आता उगवलं, विद्यमान उपमुख्यमंत्र्याचा 'CM' खुर्चीवर डोळा; तीन वेळा संधी हुकल्याची व्यक्त केली खंत

Karnataka Political News : कर्नाटकात मधल्या काळात मोठे वादळ घोवत होते. मुख्यमंत्री सिद्धरामय्या यांना हटवण्यासाठी डी. के. शिवकुमार यांनीच लॉबिंग केले होते. त्यानंतर दिल्लीत काँग्रेस हायकमांडने यावर निर्णय घेतला आणि शिवकुमार कर्नाटकचे नवे मुख्यमंत्री झाले. यानंतर त्यांच्या मंत्रिमंडळात काही नव्या चेहऱ्यांना संधी तर सिद्धरामय्यांच्या जवळच्या काही लोकांना बाहेरचा रस्ता दाखवण्यात येईल अशी चर्चा आहे. अद्याप मंत्रिमंडळ विस्तार झालेला नाही.

तोच आता विद्यमान उपमुख्यमंत्री जी. परमेश्वर यांनी मुख्यमंत्री होण्याची तीन वेळा संधी हुकल्याची खंत बोलून दाखवत खळबळ उडवून दिली आहे. या विधानामुळे आता शिवकुमारांनी मुख्यमंत्रीच्या खुर्चीसाठी जे पेरलं तेच आता उगवलं अशी चर्चा होताना दिसत आहे.

कर्नाटकचे उपमुख्यमंत्री जी. परमेश्वर हे तुमकूर येथील सिद्धार्थ शिक्षण संस्थेत आयोजित सत्कार समारंभाला आले होते. या समारंभात बोलताना त्यांनी आपल्या राजकीय प्रवासातील काही महत्त्वाच्या घडामोडींचा उल्लेख केला. याचवेळी त्यांनी, आपल्या हातातून मुख्यमंत्रिपदाची संधी तीन वेळा गेल्याची खंत व्यक्त केली आहे.

यावेळी ते म्हणाले, माझे नशीब की दुर्दैव माहीत नाही; पण मला मुख्यमंत्री होता आले नाही. परमेश्वर म्हणाले, ‘२०१३ मध्ये मी निवडणुकीत पराभूत झालो. त्यावेळी मी जिंकलो असतो, तर सिद्धरामय्या मुख्यमंत्री झाले नसते. २०१८ मध्ये धर्मनिरपेक्ष जनता दलासोबत महाआघाडीचे सरकार स्थापन झाले, तेव्हाही मला मुख्यमंत्री होण्याची संधी होती.

मात्र, काही कारणांमुळे एच. डी. कुमारस्वामी यांना मुख्यमंत्री करण्यात आले.’ ते पुढे म्हणाले, ‘आताही मुख्यमंत्रिपदासाठी आणखी एक संधी होती; पण तीही मिळाली नाही. राजकारणात अनेक अनपेक्षित घडामोडी घडत असतात. त्यामुळे मुख्यमंत्रिपद मिळाले नाही.’

तथापि, पक्षाने आपल्यावर मोठी जबाबदारी सोपविल्याचे सांगत त्यांनी समाधान व्यक्त केले. ‘सध्या मला उपमुख्यमंत्रिपदाची जबाबदारी दिली आहे. पक्षाने दाखविलेला विश्वास सार्थ ठरवत ही जबाबदारी प्रामाणिकपणे पार पाडू, असे परमेश्वर यांनी सांगितले.