संरक्षणमंत्री राजनाथसिंह यांना कोरोनाची लागण

नवी दिल्ली : देशाचे संरक्षणमंत्री राजनाथसिंह (Rajnath Singh) यांनाही कोरोनाची (Covid-19) लागण झाली आहे. सिंग यांची कोरोना चाचणी अहवाल पॉझिटिव्ह आला आहे. याबाबत त्यांनीच ट्वीटरच्या माध्यमातून याबाबत माहिती दिली आहे. सिंग यांना कोरोनाची सौम्य लक्षणे असून ते यासाठी घरीच उपचार घेत आहेत. त्यांची प्रकृती सध्या चांगली असल्याची माहिती मिळाली असून त्याच्या संपर्कात आलेल्यांना त्यांनी कोरोना तपासणी करण्याचे आवाहन केले आहे.

राजनाथ सिंहांना कोरोनाची लागण झाल्याची माहिती त्यांनी आपल्या अधिकृत ट्वीटर हँडलवरून ट्वीट करत दिली आहे. सिंग ट्वीटमध्ये म्हणाले की 'माझी करोना चाचणी पॉझिटिव्ह आली आहे. मला सौम्य स्वरूपाची लक्षणे आहेत आणि मी होम क्वारंटाइन आहे. 'अलीकडील काही दिवसांत जे माझ्या संपर्कात आले आहेत त्या सर्वांनी कोरोना चाचणी करून घ्यावी आणि विलगीकरणात राहावे', असे आवाहन त्यांनी केले आह

दरम्यान, देशात गेल्या काही दिवसांपासून कोरोना रुग्णसंख्येत मोठी वाढ झालेली बघायला मिळत आहे. अनेक मंत्री, राजकीय नेतेमंडळी व काही सिलेब्रिटींनाही कोरोनाची लागण झाली आहे. राजधानी दिल्लीत तर करोनाची स्थिती गंभीर बनली असून दिल्लीचे मुख्यमंत्री अरविंद केजरीवाल यांनाही कोरोनाची लागण झाली होती. याबरोबरच महाराष्ट्रात अनेक मंत्री व आमदार खासदारांनाही कोरोनाची लागण झाली आहे. या पार्श्वभूमीवर राज्यात कोरोना रोखण्याठी अनेक निर्बंध लावण्यात आले आहेत.