Praful Patel - Sharad Pawar Meet: राष्ट्रवादीत पडद्यामागे मोठ्या घडामोडी ? प्रफुल्ल पटेल अन् शरद पवारांची भेट; राजकीय चर्चांना उधाण

Delhi News : उपमुख्यमंत्री अजित पवार यांच्या बंडानंतर राष्ट्रवादी काँग्रेसमध्ये उभी फूट पडली. पक्षात दोन गट निर्माण झाले असून, अजितदादांचा गट सत्तेत, तर शरद पवारांचा गट विरोधी पक्षात आहे. एवढंच नाही तर पक्षाच्या चिन्हाचा वाद थेट निवडणूक आयोगात पोहाेचला आहे. असे असतानाच आता अजित पवारांच्या गटाचे नेते प्रफुल्ल पटेल यांनी राष्ट्रवादीचे अध्यक्ष शरद पवारांची भेट घेतल्याचे समोर आले आहे.

केंद्र सरकारने संसदेचे विशेष अधिवेशन बोलावले असून, या अधिवेशनासाठी शरद पवार दिल्लीत आहेत. महिला आरक्षणाचे विधेयक मंगळवारी संसदेत मांडण्यात आले. याचवेळी शरद पवार आणि प्रफुल्ल पटेल यांची भेट झाल्याची माहिती समोर आली असून, यासंदर्भात प्रफुल्ल पटेल यांनी ट्विटही केले आहे. त्यामुळे राष्ट्रवादीत पडद्यामागे काही घडामोडी घडत आहेत का ? अशा चर्चा आता राजकीय वर्तुळात सुरू झाल्या आहेत.

काय आहे प्रफुल्ल पटेलांचे ट्विट ?

शरद पवार आणि प्रफुल्ल पटेल यांची संसदेत भेट झाल्याचे फोटो प्रफुल्ल पटेल यांनी शेअर केले आहेत. प्रफुल्ल पटेल यांनी ट्विटमध्ये म्हटलं आहे की, "नवीन संसद भवनातील आजचा दिवस ऊर्जेप्रमाणे उत्साहित राहिला. राज्यसभा चेंबर खूपच आकर्षक आहे आणि हा क्षण शरद पवारांसोबत शेअर केल्याने आणखीनच खास बनला. तसेच कॅफेटेरियामध्ये मित्रांसह काही स्नॅक्स आणि मैत्रीपूर्ण वातावरणाचा आस्वाद घेतला. खरोखरच लक्षात राहावा, असा आजचा दिवस आहे", असे प्रफुल्ल पटेलांनी आपल्या ट्विटमध्ये म्हटले आहे.

दरम्यान, याआधीदेखील दोन वेळा अजित पवारांच्या गटाने शरद पवारांची भेट घेतली होती. तसेच शरद पवार आणि अजितदादांची पुण्यातील गुप्त भेट चर्चेत आली होती. यानंतर आता प्रफुल्ल पटेल यांनी शरद पवार यांच्यासोबतच्या भेटीचा फोटो शेअर केला आहे. त्यामुळे आता राजकीय वर्तुळात उलट-सुलट चर्चांना उधाण आलं आहे.

Edited By- Ganesh Thombare