Election Commission : निवडणूक आयोगाची मोठी कारवाई, महाराष्ट्रातील 'या' राजकीय पक्षांची नोंदणी रद्द

Maharashtra Political Parties : राहुल गांधींच्या निशाण्यावर असलेल्या निवडणूक आयोगाने मोठी कारवाई करत तब्बल 334 राजकीय पक्षांची नोंदणी रद्द केली आहे. यामध्ये महाराष्ट्रातील तब्बल 9 पक्षांचा समावेश आहे. निवडणूक आयोगाने काही महिन्यांपूर्वी पक्षांची चौकशी करण्याचे निर्देश दिले होते. त्यामध्ये काही पक्ष निवडणूक आयोगाच्या नियमांचे पालन करत नसल्याचे समोर आले होते. त्यामुळे पक्षांचे अस्तित्व संपवत त्यांची मान्यता रद्द करण्यात आली आहे.

महाराष्ट्रातील मान्यता रद्द झालेल्या राजकीय पक्षांमध्ये आवामी विकास लीग, इंडियन मिलन पार्टी ऑफ इंडिया, नवभारत डेमोक्रेटिक पार्टी, बहुजन रयत पार्टी, भारतीय संग्राम परिषद, लोक पार्टी ऑफ इंडिया, युवा शक्ति संघटना, नवबहुजन समाज परिवर्तन पार्टी, पीपल्स गार्डियन या पक्षांचा समावेश आहे.

निवडणूक आयोगाने केलेल्या कारवाईमध्ये मान्यता रद्द झालेल्या पक्षांमध्ये सर्वाधिक पक्ष हे उत्तर प्रदेशमधील आहेत. उत्तर प्रदेशमधील तब्बल 114 पक्षांचा समावेश आहे. उत्तर प्रदेश खालोखाल दिल्ली दुसऱ्या क्रमांकावर असून दिल्लीतील 27 पक्षांची मान्यता रद्द करण्यात आली आहे.

सहा राष्ट्रीय पक्ष

निवडणूक आयोगाने केलेल्या कारवाईनंतर देशभरात केवळ सहा राष्ट्रीय तर 67 प्रादेशिक पक्ष राहिलेले आहेत. राष्ट्रीय पक्षांमध्ये काँग्रेस, भाजप, बहुजन समाजवादी पार्टी, भारतीय कम्युनिस्ट पार्टी (मार्क्सवादी), नॅशनल पीपल्स पार्टी आणि आम आदमी पार्टी (आप) यांचा समावेश होत आहे.

देशात एकुण राजकीय पक्ष किती?

निवडणूक आयोगाने काही राजकीय पक्षांची मान्यता रद्द केल्याने राष्ट्रीय आणि प्रादेशिक पक्षांच्या संख्येत मोठा बदल झालेला नाही. मात्र, नोंदनीकृत आणि बिगर मान्यताप्राप्त पक्षांच्या संख्येत बदल झाला आहे. आयोगाच्या कारवाईपूर्वी एकुण 2 हजार 854 नोंदणीकृत पक्ष होते. मात्र आता त्यांची संख्या  2 हजार 520 येवढी झाली आहे.