Karnataka Election : निवडणूक आयोगाची काँग्रेस पक्षाला नोटीस; काय आहे कारण ?

ECI notice to Mallikarjun Kharge : कर्नाटक विधानसभा निवडणूक २०२३ मध्ये काँग्रेसच्या अडचणी वाढल्या आहेत. काँग्रेसने ट्विटरवर कर्नाटकच्या सार्वभौमत्वाबाबत पोस्ट टाकली आहे. त्यावरून भाजपने निवडणूक आयोगाकडे तक्रार केली होती. यानंतर निवडणूक आयोगाने काँग्रेस अध्यक्ष मल्लिकार्जुन खरगे यांना नोटीस पाठवली आहे.

या सोशल मीडिया पोस्टवर निवडणूक आयोगाने खर्गे यांच्याकडून स्पष्टीकरण मागितले आहे. या पोस्टमधील वक्तव्य सोनिया गांधी यांचे असल्याचे म्हटले जात आहे. निवडणूक आयोगाने सोशल मीडिया पोस्टबाबत धोरण स्पष्ट करण्यास आणि त्यात सुधारणा करण्याबाबतही खर्गे यांना सांगितले आहे.

कर्नाटकातील (Karnataka) हुबळी येथे सोनिय गांधी यांनी ६ मे रोजी सभा घेतली होती. रॅली संपल्यानंतर काँग्रेस पक्षाने (Congress) आपल्या सोशल मीडियावर एक ट्विट केले. त्यात 'काँग्रेस संसदीय पक्षाच्या (सीपीपी) अध्यक्षा सोनिया गांधी यांच्याकडून कर्नाटकच्या साडेसहा कोटी जनतेला कडक संदेश. कर्नाटकची विश्वासार्हता, सार्वभौमत्व आणि अखंडता काँग्रेस कधीही धुळीला मिळू देणार नाही,' म्हटले आहे. मात्र, सोनिया गांधी यांनी असे काहीही बोलले नसल्याचे काँग्रेस प्रवक्ते सांगत आहेत.

काँग्रेसच्या या पोस्टवरून भाजपने निवडणूक आयोगाकडे तक्रार केली होती. सार्वभौमत्वाबद्दल बोलून सोनिया गांधी (Sonia Gandhi) यांनी देशाच्या संविधानाचा अवमान केल्याचा आरोप भाजपने केला आहे. यासाठी सोनिया गांधी यांनी देशाची जाहीर माफी मागावी. केंद्रीय मंत्री भूपेंद्र यादव, जितेंद्र सिंह आणि पक्षाचे नेते अनिल बलूनी यांच्या नेतृत्वाखालील भाजपच्या शिष्टमंडळाने सोमवारी (ता. ८) निवडणूक आयोगाची भेट घेत कारवाईची मागणी केली.

काय म्हणाल्या सोनिया गांधी ?

कर्नाटकातील हुबळी येथे ६ मे रोजी सोनिया गांधी यांची शेवटची सभा झाली. त्या निवडणूक प्रचारादरम्यान सोनिया गांधी यांनी भाजपवर टीकास्त्र सोडले होते. त्या म्हणाल्या की, "कर्नाटकची प्रतिष्ठा, सार्वभौमत्व किंवा अखंडतेला काँग्रेस कोणालाही धोका निर्माण करू देणार नाही."