Eknath Shinde News : २०१९ मधील चूक सुधारली; लखनौला पोहचताच मुख्यमंत्री शिंदेंचा ठाकरेंवर हल्लाबोल

Eknath Shinde Reached Lucknow : अयोध्या दौऱ्यासाठी मुख्यमंत्री एकनाथ शिंदे सायंकाळी मुंबईहून लखनौसाठी रवाना झाले होते. ते रात्री आठच्या सुमारास लखनौ येथे पोहचले. तेथे मुख्यमंत्री शिंदे यांचे ढोल-ताशांच्या गजरात व शिवसेनेच्या पदाधिकाऱ्यांसह उत्तर प्रदेश सरकारमधील मंत्र्यांच्या उपस्थित स्वागत केले. त्यावेळी त्यांनी प्रसारमाध्यमांशी संवाद साधला. स्वागतासाठी केलेली तयारी आणि वातावरण पाहून भारावलो असल्याचे भावना यावेळी मुख्यमंत्री शिंदे यांनी व्यक्त केली.

मुख्यमंत्री एकनाथ शिंदे (Eknath Shinde) म्हणाले, "मुख्यमंत्री झाल्यानंतर आज प्रथमच प्रभू रामचंद्राच्या पदस्पर्शांनी पावन झालेल्या भूमित आलो आहे. येथे दोन तीन दिवसांपासून उत्साह आहे. येथे रामभक्तांनी संपूर्ण भगवे, हिंदुत्वाचे वातावरण केले आहे. या प्रभू रामचंद्राच्या भूमिवर मी नतमस्तक होतो."

अयोध्या येथील राम मंदिरामुळे बाळासाहेब ठाकरे (Balasaheb Thackeray) आणि लाखो रामभक्तांचे स्वप्न साकार झाल्याचे शिंदे यावेळी म्हणाले. मुख्यमंत्री शिंदे यांनी सांगितले, "अयोध्या आमच्यासाठी भावना, श्रद्धा आणि अस्मितेचा विषय आहे. अयोध्येत रामाचे मंदिर असावे, हे बाळासाहेबांचे स्वप्न होते. त्यानुसार येथील मंदिराचे काम सुरू आहे. ते लवकरच पूर्ण होणार आहे. या मंदिरामुळे बाळासाहेबांसह लाखो रामभक्तांचे स्वप्न पूर्ण होत आहे."

यानंतर त्यांनी उद्धव ठाकरे (Uddhav Thackeray) यांच्यावर हल्ला केला. मुख्यमंत्री शिंदे म्हणाले, "सरकार स्थापनेसाठी २०१९ मध्ये हिंदुत्व सोडले होते. त्यानंतर आम्ही २०१९ मध्ये झालेली चूक सुधारली आहे. भाजप-शिवसेनेचे भूमिका एक आहे. आमचे विचार एक आहेत. राज्यात आम्ही चांगले काम करत आहे. पूर्वाच्या राज्यात साधूंची हत्या झाली, तशी या राज्यात होणार नाही."

दरम्यान, लखनौ विमातळ परिसरात मुख्यमंत्री शिंदेंच्या स्वागतासाठी मोठी गर्दी दिसून आली. त्यावेळी उपस्थितांनी 'जय श्री राम' अशा जयघोष करत परिसर दणाणून सोडला. मुख्यमंत्र्यासंह आलेल्या सर्व आमदार आणि खासदारांचेही पुष्पहार घालून स्वागत करण्यात आले.

(Edited by Sunil Dhumal)