Girija Vyas Accident: धक्कादायक! माजी केंद्रीय मंत्री गिरीजा व्यास गंभीर जखमी, ओढणीने पेट घेतला; उपचारासाठी अहमदाबादला हलवलं

Rajasthan News : राजस्थान काँग्रेसमधील बडे प्रस्थ असलेल्या आणि माजी केंद्रीय मंत्री डॉ. गिरिजा व्यास यांच्याबाबत एक धक्कादायक घटना समोर आली आहे. त्या पूजा करत असताना गंभीररित्या भाजल्या गेल्या आहेत. त्यांना उदयपूरहून अहमदाबादला उपचारासाठी हलवण्यात आले आहे.

उदयपूर येथे काँग्रेसच्या (Congress) नेत्या माजी केंद्रीय मंत्री डॉ. गिरिजा व्यास यांच्याबाबतीत विचित्र दुर्घटना घडली. व्यास ह्या आपल्या निवासस्थानी देवांची पूजा करत असताना भाजून गंभीर जखमी झाल्या आहेत. देवघराच्या येथे लावलेल्या दिव्याच्या ज्योतीने त्यांच्या ओढणीनं अचानक पेट घेतल्यानं त्या गंभीररित्या भाजल्या गेल्या.

केंद्रीय मंत्री डॉ.गिरिजा व्यास यांना या अपघातानंतर उदयपूरमधील एका खासगी रुग्णालयात दाखल करण्यात आले होते. पण आता प्रकृती गंभीर असल्यानं त्यांना त्यांच्या कुटुंबियांनी अहमदाबादला उपचारासाठी रवाना केले आहे. या घटनेची माहिती काहीवेळातच काँग्रेसच्या गोटात पसरली आहे.

माजी केंद्रीय मंत्री आणि काँग्रेसच्या नेत्या डॉ.गिरिजा व्यास नेहमीप्रमाणे पूजा करत होत्या. त्यावेळी त्यांच्या ओढणीला दिव्याचा स्पर्श झाला. यामुळे ही दुर्घटना घडली. गणगौरच्या पूजेदरम्यान ही घटना घडली आहे.

काँग्रेसच्या नेत्या गिरिजा व्यास चित्तोडगड मतदारसंघातून 15 व्या लोकसभेच्या सदस्य होत्या आणि भारताच्या राष्ट्रीय महिला आयोगाच्या माजी अध्यक्षा राहिल्या आहेत. त्या 1985 मध्ये भारतीय राष्ट्रीय काँग्रेस पक्षाच्या उमेदवार म्हणून राजस्थानमधील (Rajasthan) उदयपूर येथून विधानसभेच्या सदस्य म्हणून निवडून आल्या आणि 1990 पर्यंत राजस्थान सरकारमध्ये मंत्री म्हणून काम केले.

तसेच 1991 मध्ये, त्या लोकसभेत उदयपूर,राजस्थानचे प्रतिनिधित्व करत भारतीय संसदेत निवडून आल्या आणि नरसिंह रावांच्या मंत्रालयात भारत सरकारमध्ये उपमंत्री (माहिती आणि प्रसारण) म्हणून त्यांनी जबाबदारी सांभाळली होती.