Harish Rana death : देशाला रडवून गेला हरीश राणा; 13 वर्षांपासून होता कोमात, ‘एम्स’मध्ये घेतला अखेरचा श्वास...

देशातमध्ये पहिल्यांदाच इच्छामरणाची परवानगी मिळालेल्या हरीश राणा याने मंगळवारी अखेरचा श्वास घेतला. मागील १३ वर्षांपासून तो कोमामध्ये होता. या काळात त्याला लाईफ सपोर्ट सिस्टीमचा आधार होता. मात्र, आई-वडिलांनी सुप्रीम कोर्टात त्याच्या इच्छामरणासाठी (Passive Euthanasia) याचिका दाखल केली होती. कोर्टाने ही विनंती मान्य करत इच्छामरणास परवानगी दिली होती.   

सुप्रीम कोर्टाच्या निकालानंतर हरीशला १४ मार्च रोजी दिल्लीतील अखिल भारतीय आयुर्विज्ञान संस्थेत (AIIMS) दाखल करण्यात आले होते. मागील दहा दिवसांपासून त्याचे खाणे-पिणे तसेच वैद्यकीय उपचार पूर्णपणे बंद करण्यात आले होते. ३१ वर्षीय हरीश राणाच्या इच्छामरणास कोर्टाने ११ मार्चच्या ऐतिहासिक निकालाने परवानगी दिली होती.

हरीश हा मुळचा उत्तर प्रदेशातील गाझियाबाद येथील आहे. १३ वर्षांपूर्वी अभियांत्रिकी शिक्षणासाठी चंदीगढ येथे हॉस्टेलमध्ये राहत होता. तो या हॉस्टेलच्या चौथ्या मजल्यावरील बाल्कनीतून खाली पडला होता. त्याच्या मेंदूला गंभीर दुखापत झाली होती. तेव्हापासून तो कोमामध्ये आहे.

हरीशच्या आई-वडिलांनी मुलाच्या इच्छामरणाची याचिका सुप्रीम कोर्टात दाखल केली होती. एम्सने तो कधीच बरा होण्याची कोणतीही चिन्हे नसल्याचे स्पष्ट केले होते. कोर्टानेच याबाबत एम्सकडे अहवाल मागविला होता. या अहवालाच्या आधारे कोर्टाने ऐतिहासिक निकाल देत हरीश राणाचा लाईफ सपोर्ट हटविण्यास परवानगी दिली होती.

कोर्टाच्या निकालानंतर हरीशचा एक व्हिडीओ सोशल मीडियात व्हायरल झाला होता. गाझियाबाद येथील घरातील हे भावूक करणारे दृश्य होते. ब्रम्हाकुमार संस्थेतील एक महिला सदस्य हरीश कपळावर टिळा लावताना दिसत होत्या. अत्यंत शांतपणे हरीश म्हणत होत्या की, ‘सर्वांना क्षमा करून णि सर्वांची माफी मागून आता शांतपणे विश्राम करा.’ या व्हिडीओमुळे अनेकांचे डोळे पाणावले होते.