Heeraben Modi News Update : हिराबेन मोदी अनंतात विलीन

Heeraben Modi Death : पंतप्रधान नरेंद्र मोदी (Narendra Modi) यांच्या मातोश्री हीराबेन मोदी यांच्या पार्थिवावर अंत्यसंस्कार करण्यात आले. गुजरात येथील गांधीनगर याठिकाणी त्यांच्यावर अंत्यसंस्कार करण्यात आले. आज (दि.30) पहाटे साडेतीन वाजण्याच्या सुमारास निधन झालं. त्यांनी शंभराव्या वर्षी अखेरचा श्वास घेतला. पंतप्रधान मोदी हे आईच्या अंतिम दर्शनासाठी सकाळीच गांधीनगरमध्ये दाखल झाले. त्यानंतर त्यांनी मातोश्री हीराबेन यांच्या पार्थिवाचं दर्शन घेत श्रध्दांजली वाहिली.

त्यानंतर काही वेळातच हीराबेन मोदी यांच्या अंत्ययात्रेला सुरुवात झाली. गेल्या काही दिवसांपासून हिराबेन यांच्यावर यूएन मेहता रुग्णालयात उपचार सुरु होते. आज पहाटे साडेतीन वाजता उपचारादरम्यान त्यांचं निधन झालं. यानंतर पंतप्रधान नरेंद्र मोदी (PM Narendra Modi) यांचे धाकटे बंधू पंकज मोदी यांच्याघरी हीराबेन यांचं पार्थिव दर्शनासाठी ठेवण्यात आलं होतं.

पंतप्रधान मोदींच्या मातोश्री हीराबेन मोदी यांच्या निधनानंतर देशाचे गृहमंत्री अमित शाह, संरक्षणमंत्री राजनाथ सिंह, केंद्रीय मंत्री नितीन गडकरी,मुख्यमंत्री एकनाथ शिंदे, विरोधी पक्षनेते अजित पवार यांच्यासह देश विदेशातील राजकीयसह सर्वच क्षेत्रातून पंतप्रधान मोदी यांच्या आईच्या निधनाबद्दल शोक व्यक्त करत त्यांना भावपूर्ण श्रध्दांजली अर्पण करण्यात येत आहे.

आईच्या निधनानंतर पंतप्रधान नरेंद्र मोदींनी ट्विटरवरून शोक व्यक्त करत श्रद्धांजली वाहिली आहे. आईमध्ये नेहमीच एका ब्रह्मा, विष्णू आणि महेश या त्रिमूर्तींचा भास व्हायचा असं म्हटलं आहे.