Jagdeep Dhankhar: "उपराष्ट्रपतीपदाचा राजीनामा आरोग्याच्या समस्येमुळं दिला नव्हता तर..."; जगदीप धनखड यांचा खळबळजनक खुलासा

Jagdeep Dhankhar: देशाचे माजी राष्ट्रपती जगदीप धनखड यांनी २१ जुलै २०२५ रोजी आपल्या पदाचा अचानक राजीनामा दिला होता. सर्वोच्चपदाचा अशा पद्धतीनं अचानक राजीनामा दिल्यानं देशात मोठं वादंग निर्माण झालं होतं. मोदी सरकारनंच धनखड यांना राजीनामा द्यायला भाग पाडलं अशा पद्धतीच्या चर्चा सुरु झाल्या होत्या.

पण विशेष म्हणजे या राजीनाम्यामागं धनखड यांनी आपल्या आरोग्याचं कारण सांगितलं होतं. पण आता त्यांनीच आपण आरोग्याच्या कारणानं राजीनामा दिला नव्हता असं म्हटल्यानं खळबळ उडाली आहे. कारण मग त्यांनी नेमका कोणत्या कारणासाठी ही कृती केली याची पुन्हा एकदा चर्चा सुरु झाली आहे.

प्रकृती अस्वास्थ्यामुळं राजीनामा नाही

एका कार्यक्रमात बोलताना नुकतेच जगदीप धनखड यांनी आपण कुठल्या कारणासाठी उपराष्ट्रपतीपदाचा राजीनामा दिला, याचा खुलासा केला आहे. राजस्थानातील सादुलपूर इथं या कार्यक्रमात धनखड म्हणतात, रामसिंग यांच्या कुटुंबियांच्या आरोग्यासाठी मी या ठिकाणी आलो आहे. पण जेव्हा कधी माझ्या आरोग्याचा प्रश्न निर्माण झाला तेव्हा रामसिंग यांनी मला साथ दिली. असं म्हणतात की पहिलं सुख हे निरोगी असण्यात आहे, त्यामुळं मी कधी आरोग्याच्या बाबतीत हेळसांड केली नाही.

मी जेव्हा म्हटलं होतं की, मी उपराष्ट्रपतीपद त्यागतो आहे तेव्हा मी कधीही हे म्हटलं नाही की आजारी आहे. मी म्हटलं होतं की, मी आरोग्याला महत्व देत आहे. आरोग्याला महत्व द्यायलाही हवं, कारण आपल्या शास्त्रांमध्येही सांगितलं आहे. मी अनेकदा अशा गोष्टी बोललो ज्यामुळं लोकांना त्याचा राग यायचा पण मी थेटपणे बोलायचो, असंही पुढे जगदीप धनखड यांनी म्हटलं आहे.

पुन्हा प्रश्न उपस्थित

दरम्यान, जगदीप धनखड यांनी आपल्या उपराष्ट्रपतीपदाच्या राजीनाम्यासाठी दिलेल्या कारणाबाबतच महत्वाचा खुलासा केल्यानं आता ते पुन्हा एकदा चर्चेत आले आहेत. पण त्यांच्या या खुलाशामुळं आता पुन्हा एकदा प्रश्न उपस्थित होत आहे की, जर धनखड यांनी आपल्या अस्वास्थाच्या कारणास्तव राजीनामा दिला नव्हता तर मग नेमकं त्यांच्या राजीनाम्यामागील कारण काय होतं. कारण ही गोष्ट त्यांनी अद्यापही स्पष्ट केलेली नाही. त्यामुळं सहाजिकच त्यांच्या राजीनाम्यामागे काहीतरी राजकीय महत्वाचं कारणच असावं असंही बोलल जात आहे.