Lok Sabha seats : मोठी बातमी : लोकसभेच्या जागा 816 पर्यंत वाढणार, सरकारचा प्लॅन तयार; 2011 ची जनगणनाच ठरणार गेमचेंजर

Women reservation bill 33 percent : मोदी सरकारकडून लोकसभा आणि विधानसभांमध्ये महिलांना ३३ टक्के आरक्षण लागू करण्यासाठी मोठे पाऊल उचलले जाण्याची शक्यता आहे. सरकार नारी शक्ती वंदन सुधारित अधिनियम विधेयक संसदेत आणणार असल्याची जोरदार चर्चा आहे. त्यासाठी २०११ मध्ये झालेली जनगणना गेमचेंजर ठरणार आहे.

सरकारने २०२४ च्या लोकसभा निवडणुकीआधी विशेष अधिवेशन बोलवत महिला आरक्षणाचा विधेयक पारित केले होते. मात्र, या विधेयकामध्ये नव्या जनगणनेनंतर आरक्षण लागू होईल, अशी तरतूद आहे. मात्र, नवी जनगणना आणि त्यानंतर मतदारसंघाची पुनर्रचना होण्यास बराच कालावधी लागू शकतो. २०२९ च्या लोकसभा निवडणुकीत हे आरक्षण लागू होण्याची शक्यता धूसर आहे.

यापार्श्वभूमीवर सरकारकडून विधेयकामध्ये सुधारणा करून सुधारित विधेयक आणले जाणार असल्याची चर्चा आहे. या विधेयकामध्ये आरक्षणासाठी मतदारसंघांची पुनर्रचना करण्यासाठी २०११ ची जनणना ग्राह्य धरण्याची तरतूद असेल. असे झाल्यास लोकसभेच्या सध्याच्या ५४३ जागांवरून हा आकडा ८१६ पर्यंत वाढेल. त्यामध्ये महिलांसाठी २७३ जागा आरक्षित असतील.

२०११ ची लोकसंख्या ग्राह्य धरून पुनर्रचना करण्याचा निर्णय झाल्यास आगामी २०२९ च्या लोकसभा निवडणुकीतच महिला आरक्षण लागू होईल. त्याचप्रमाणे हे विधेयक पारित झाल्यानंतर होणाऱ्या विधानसभा निवडणुकांमध्ये विविध राज्यांमध्ये महिलांना ३३ टक्के आरक्षण मिळेल. यादृष्टीने सरकारने तयारी सुरू केल्याचे वृत्त आहे.

सरकारकडून याची तयारी सुरू करण्यात आली आहे. खुद्द केंद्रीय गृहमंत्री अमित शाह विरोधी पक्षातील नेत्यांशी चर्चा करत असल्याचे वृत्त ‘आज तक’ने दिले आहे. सुरूवातीला छोट्या पक्षांच्या नेत्यांसोबत चर्चा केली जात आहे. टप्प्याटप्प्याने राष्ट्रीय पक्षांशी चर्चा केली जाणार असल्याचे समजते. त्यामुळे लवकरच हे विधेयक संसदेत येण्याची शक्यता आहे.