भाजपची वाटचाल बहुमताकडे पण मुख्यमंत्री म्हणतात, सत्तास्थापना लगेच नको रे बाबा!

इम्फाळ : मणिपूर विधानसभा निवडणुकीचे (Assembly Election) हाती येत असून, सत्ताधारी भाजपने आघाडी घेतली आहे. भाजपने 60 पैकी 29 जागांवर आघाडी घेतली असून तो आता बहुमताच्या जवळ आला आहे. याचवेळी काँग्रेस आघाडीने 20 जागांवर आघाडी घेतली आहे. भाजपने बहुमताच्या दिशेने वाटचाल केली असली तरी मुख्यमंत्री एन.बिरेन सिंह यांनी मात्र, सत्ता स्थापनेसाठी आस्ते कदम भूमिका घेतली आहे.

सत्ता स्थापनेचा दावा लगेच न करण्याची भूमिका मुख्यमंत्री बिरेनसिंह यांनी घेतली आहे. त्यांच्या या भूमिकमुळे तर्कवितर्कांना उधाण आले आहे. ते म्हणाले की, सत्ता स्थापनेचा दावा करण्यासाठी आम्हाला थोडा वेळ लागेल. पूर्ण निकाल हाती येण्याची आम्ही वाट पाहत आहोत. पक्षाचे राष्ट्रीय नेते मुख्यमंत्रिपदाबाबत निर्णय घेणार आहेत. सर्वंकष विकासाच्या पंतप्रधान नरेंद्र मोदी यांच्या मंत्रानुसार आम्ही वाटचाल करीत आहोत.

मणिपूरमध्ये (Manipur) भाजपने कोणत्याही पक्षाशी आघाडी न करता एकला चलोची भूमिका घेतली होती. याचवेळी विरोधी पक्ष असलेल्या काँग्रेसने सहा पक्षांशी आघाडी केली होती. काँग्रेसप्रणित मणिपूर प्रोगेसिव्ह सेक्युलर अलायन्स या आघाडीने भाजपला जोरदार टक्कर दिली आहे. आता हाती आलेल्या निकालानुसार, भाजप हा 29 जागांवर आघाडीवर आहे. काँग्रेस 3 जागांवर तर काँग्रेसचे सहकारी पक्ष नॅशनल पीपल्स पार्टी 9, संयुक्त जनता दल 3 आणि नागा पीपल्स फ्रंट 4 जागांवर आघाडीवर आहेत.

मणिपूर पक्षनिहाय जागा

भाजप -29

काँग्रेस - 3

नॅशनल पीपल्स पार्टी – 9

संयुक्त जनता दल – 3

नागा पीपल्स फ्रंट – 4

मुख्यमंत्री एन.बिरेनसिंह हे 18 हजार मतांनी हेनगांग मतदारसंघातून विजयी झाले आहेत. मागील विधानसभा निवडणुकीत काँग्रेसला सर्वाधिक २८ जागा मिळाल्या होत्या. त्यावेळी भाजपला २१ जागा मिळाल्या होत्या. भाजपने इतर स्थानिक पक्षांशी आघाडी करून सत्ता काबीज केली होती आणि बिरेनसिंह हे मुख्यमंत्री झाले होते. मणिपूरमध्ये (Manipur Election) दोन टप्प्यांत विधानसभा निवडणूक झाली. यातील पहिला टप्पा 28 फेब्रुवारीला तर दुसरा टप्पा 5 मार्चला झाला. पंतप्रधान नरेंद्र मोदी यांच्यासह केंद्रीय गृहमंत्री अमित शहा हे मणिपूरमध्ये प्रचारासाठी दाखल झाले होते. त्यांनी भाजपचा जोरदार प्रचार केला होता. शहांसोबत भाजपचे बडे नेतेही मणिपूरमध्ये प्रचारासाठी मैदानात उतरले होते.