सीबीआय चौकशी मागे लागताच राज्यपालांनी दाखवलं मोदींकडं बोट

नवी दिल्ली : महाराष्ट्रात राज्यपाल विरुद्ध राज्य सरकार संघर्ष सुरू आहे. याचबरोबर इतरही राज्यांत असाच संघर्ष सुरू आहे. अंबानी आणि राष्ट्रीय स्वयंसेवक संघाच्या नेत्याकडून दीडशे-दीडशे कोटींची ऑफर होती, असा गौप्यस्फोट करून मेघालयचे राज्यपाल सत्यपाल मलिक यांनी खळबळ उडवून दिली होती. या प्रकरणी केंद्रीय अन्वेषण विभागामार्फत (CBI) चौकशी केली जाणार आहे. आता त्यांनी या प्रकरणी थेट पंतप्रधान मोदींकडे बोट दाखवले आहे.

सत्यपाल मलिक (Satyapal Malik) हे जम्मू-काश्मीरचे राज्यपाल (Governor) होते. त्यावेळी दोन फायलींवर सह्या करण्यासाठी त्यांना तीनशे कोटींच्या लाचेची ऑफर देण्यात आली होती. ही लाच घेण्यास नकार देत त्यांनी दोन्ही फायलींवर सह्या केल्या नव्हत्या. खुद्द मलिक यांनीच हा गौप्यस्फोट केला होता. आता या प्रकरणी सीबीआय चौकशीची शिफारस जम्मू-काश्मीर प्रशासनाने केली आहे. मलिक यांनी सीबीआय चौकशीचे स्वागत केले आहे. या सर्व प्रकाराची मोदींनी माहिती होती आणि त्यांनी मला पाठिंबा दिला होता, असाही दावा मलिक यांनी केला आहे.

काय म्हणाले होते मलिक?

मलिक म्हणाले होते की, मी जम्मू-काश्मीरचा राज्यपाल असताना माझ्याकडे दोन फायली आल्या होत्या. यातील एक फाईल अंबानींशी निगडित होती. दुसरी फाईल ही राष्ट्रीय स्वयंसेवक संघाचे (RSS) बडे नेते आणि तत्कालीन मेहबूबा सरकारमधील मंत्र्यांशी निगडित होती. हा नेता नरेंद्र मोदींच्या (Narendra Modi) जवळचा होता. या दोन्ही फायलींमध्ये अनियमितता असून, त्यावर सह्या केल्यास प्रत्येकी दीडशे-दीडशे कोटी रुपये मिळू शकतात, असे मला माझ्या सचिवांनी सांगितले होते. मात्र, मी या फायलींतील दोन्ही प्रस्ताव नामंजूर केले होते.

मोदींचाही होता संदर्भ

मलिक म्हणाले होते की, या दोन्ही फायली घेऊन मी पंतप्रधान नरेंद्र मोदींनी भेटायला गेलो होतो. त्यांनी मी यात असलेल्या गैरव्यवहाराबाबत स्पष्टपणे सांगितले होते. तसेच, यात सहभागी असलेल्या व्यक्तींची नावेही मी सांगितली होती. मी काय निर्णय घ्यावा, असे मी त्यांना विचारले. मी कोणत्याही परिस्थितीत फायली मंजूर करणार नाही. मला तडजोड करावी लागल्यास मी राजीनामा देईन, असे मी मोदींना सांगितले. यावर त्यांनी माझे कौतुक करीत, सत्यपाल भ्रष्टाचाराबाबत कोणतीही तडजोड करू नका, असे सांगितले होते.