MLC election news : विधानपरिषद निवडणुकीत बंडखोरी करणाऱ्या आमदारासह माजी आमदाराची पक्षातून हकालपट्टी; आमदारकीही जाणार?

Latest Bihar news : बिहारमधील शिक्षक व पदवीधर विधानपरिषद मतदारसंघाच्या १२ जागांसाठी शुक्रवारी मतदान झाले. त्यानंतर काही तासांतच संयुक्त जनता दलाने आमदार अनंत सिंह यांची पक्षातून हकालपट्टी केली आहे. पक्षाच्या अधिकृत उमेदवाराविरोधात प्रचार करणे त्यांना भोवले आहे. त्यांच्यासोबतच माजी आमदार नीलम देवी आणि युवा जेडीयूच्या प्रदेश सचिवांचीही हकालपट्टी करण्यात आली आहे.

जेडीयूने शनिवारी अनंत सिंह यांच्यावरील कारवाईचा आदेश काढला आहे. पक्षविरोधी कारवाया केल्याप्रकरणी त्यांना सहा वर्षांसाठी पक्षातून निलंबित करण्यात आल्याचे म्हटले आहे. अनंत सिंह यांनी जेडीयूचे उमेदवार नीरज कुमार यांच्याविरोधात प्रचार केला होता. त्यांनी आमदार प्रशांत भूषण यांच्या जन सुराज पक्षाचे उमेदवार अनुज कुमार यांना पाठिंबा दिला होता.

पक्षाकडून अनंत सिंह यांच्या आमदारकी रद्द करण्याची मागणीही विधानसभा अध्यक्षांकडे केली जाऊ शकते. तसे संकेत पक्षाकडून देण्यात आले आहेत. त्यामुळे अनंत सिंह यांना ही बंडखोरी महागात पडू शकते. मात्र, असे असले तरी अनंत सिंह यांना पक्षातून निलंबित करण्यात आल्यानंतर त्यांच्या समर्थकांनी घराबाहेर फटाके वाजवून आनंद व्यक्त केल्याने चर्चांना उधाण आले आहे.

माजी आमदार नीलम देवी आणि युवा जेडीयूचे सचिव अमित प्रकाश यांनीही जेडीयू्च्या उमेदवाराविरोधात काम केल्याने त्यांच्यावर निलंबनाची कारवाई करण्यात आली आहे. दरम्यान,पक्षातून निलंबित करण्यात आल्यानंतर अनंत सिंह यांनी नव्या पक्ष स्थापन करणार असल्याचे जाहीर केले. मला आमदारकीची चिंता नाही. मी कधी तिकीट मागितले नाही, पक्षानेच उमेदवारी दिली, असेही अनंत सिंह म्हणाले आहेत.

नितीश कुमार यांचा पक्ष होता, आता त्यांचे राजकारण संपले असून पक्षही संपला आहे. जेडीयूचे आता कसलेही भविष्य नाही. निवडणुकीत हे स्पष्ट होईल. पक्षाला दहा जागाही मिळणार नाहीत. पूर्वी पक्ष नितीश कुमार यांचा होता, ते स्वत: निर्णय घेत होते. पण आता तसे राहिले नाही, असा दावा सिंह यांनी केला आहे.