Leaders Of Opposition Meeting : देशातील विरोधी पक्षांच्या नेत्यांची पुढची बैठक 'या' शहरात होणार

Bangalore News : देशातील विरोधी पक्षाच्या नेत्यांची गेल्या दोन दिवसांपासून बंगळुरुमध्ये बैठक होत आहे. त्या बैठकीत विरोधी पक्षाच्या आघाडीला इंडिया हे नाव देण्याची घोषणा करण्यात आली आहे. तसेच, विरोधी पक्षाच्या नेत्यांची पुढची बैठक ही मुंबईत होणार आहे, अशी घोषणा काँग्रेस पक्षाचे राष्ट्रीय अध्यक्ष मल्लिकार्जून खर्गे यांनी केली आहे. (Next meeting of the India Alliance will be held in Mumbai)

भाजप (BJP) सरकारच्या विरोधात देशातील काँग्रेस, शिवसेना, राष्ट्रवादी, तृणमूल काँग्रेस आणि आम आदमी पार्टी, जदयू, राष्ट्रीय जनता दल, समाजवादी पक्ष, कम्युनिस्ट यांच्यासह तब्बल २६ पक्ष एकत्र आले आहेत. गेल्या दोन दिवसांपासून बंगळुरूमधील (Bengalore) विरोधकांच्या बैठकीला तब्बल २६ पक्षाच्या नेत्यांनी हजेरी लावली आहे. विशेष म्हणजे ती संख्या पाटण्यापेक्षा अधिक आहे.

दरम्यान, विरोधकांच्या आघाडीला इंडिया असे नाव देण्यात आले आहे. त्याबाबतचा प्रस्ताव काँग्रेस नेते राहुल गांधी यांनी मांडला. त्यास सर्व पक्षाच्या नेत्यांनी अनुमोदन दिले. विरोधकांची ही आघाडी आगामी लोकसभा निवडणूक इंडिया नावाखाली लढवणार आहे. या आघाडीची ‘UNITED WE STAND...' अशी घोषणा असणार आहे.

विरोधकांच्या आघाडीच्या बैठकीच्या नियोजनासाठी ११ सदस्यांची समिती नेमण्यात येईल. त्यात एक सचिव कॅम्पेन मॅनेजमेंटसंदर्भात काम करतील, असेही खर्गे यांनी स्पष्ट केले. विरोधी पक्ष एकत्र आल्याचे पाहून पंतप्रधान नरेंद्र मोदी आता त्यांच्या आघाडीतील पक्षाचे तुकडे तुकडे जोडत आहेत, असा टोमणाही आजच्या एनडीएच्या बैठकीच्या पार्श्वभूमीवर खर्गे यांनी भाजपला लगावला.

दरम्यान, विरोधी पक्षातील नेत्यांची पहिली बैठक ही बिहारची राजधानी पाटणा येथे २३ जून रोजी झाली होती. त्यात बैठकीला देशभरातील सुमारे १६ पक्षाचे प्रमुख उपस्थित होते. त्याच वेळी पुढची बैठक सिमल्यात घेण्याचे ठरले होते. मात्र, सिमल्यात अतिवृष्टी होत असल्याने बंगळुरूमध्ये बैठक घेण्याचे ठरले होते, त्यानुसार १७ आणि १८ जुलै रोजी बंगळुरूमध्ये विरोधी पक्षाच्या नेत्यांची बैठक झाली.