Delhi Election Results 2025 : "लढा आणि एकमेकांना संपवा..." दिल्ली विधानसभा निकालाची आकडेवारी समोर येताच ओमर अब्दुल्लांचा आप-काँग्रेसवर हल्लाबोल

Delhi Assembly election 2025 news LIVE : दिल्ली विधानसभा निवडणुकीची मतमोजणी शनिवारी (ता. 08) सकाळपासून सुरू आहे. 70 विधानसभा मतदारसंघासाठी झालेल्या या निवडणुकीत आम आदमी पक्ष (Aam Adami Party), भाजप आणि काँग्रेसमध्ये चुरशीची लढत झाली.

मात्र, देशात इंडिया आघाडीत एकत्र असलेल्या आप आणि काँग्रेस पक्षाने दिल्ली (Delhi) विधानसभेची निवडणूक स्वतंत्र लढवली. त्याचेच परिणाम आता सुरू असलेल्या मतमोजणीत पाहायला मिळत आहेत. कारण आतापर्यंतच्या आकडेवारीनुसार दिल्लीतील 70 जागांपैकी भाजप 43 जागांवर आघाडीवर आहे. तर आप 26 जागांवर आघाडीवर आहे.

काँग्रेसला (Congress) मात्र दिल्लीत खातं देखील अद्याप उघडता आलेलं नाही. निकालाच्या याच आकडेवारीवरून जम्मू-काश्मीरचे मुख्यमंत्री ओमर अब्दुल्ला (Omar Abdullah) यांनी आम आदमी पार्टी आणि काँग्रेसवर टीका केली आहे. दिल्ली निवडणुकीच्या सध्याच्या कलांनुसार आप पिछाडीवर तर काँग्रेस एकाही जागेवर आघाडीवर नाही.

मात्र, या निवडणुकीत काँग्रेस आणि आप एकत्र लढले असते तर वेगळं चित्र पाहायला मिळालं असतं अशी चर्चा सध्या चालू आहे. याच मुद्द्यावरून ओमर अब्दुल्ला यांनी 'एक्स'वर पोस्ट केली आहे. ज्यामध्ये त्यांनी लिहिलं की, आपापसात आणखी लढा आणि एकमेकांना संपवा, असं म्हटलं आहे. यासाठी त्यांनी एका व्हायरल मीमचा वापर केल्याचं पाहायला मिळत आहे. या मीममध्ये 'और लढो आपस मै' असा मजकूर आहे.

दरम्यान, आप आणि काँग्रेस लोकसभा निवडणूक इंडिया आघाडीत एकत्र लढले होते. मात्र, दिल्ली विधानसभेत दोन्ही पक्षांनी स्वतंत्र लढण्याची घोषणा केली. त्यानुसार त्यांनी दिल्लीतील सर्व 70 जागांवर एकमेकांच्या विरोधात उमेदवार उभे केले. मात्र, याचा फायदा भाजपला (BJP) झाल्याचं पाहायला मिळत आहे. कारण सध्याच्या आकडेवारीनुसार भाजप बहुमताचा आकडा पार करताना दिसत आहे.