Dr Babasaheb Ambedkar Row : संसदेच्या आवारात घमासान; भाजप खासदार ICU मध्ये; केंद्रीय मंत्री रुग्णालयात पोहचले

New Delhi : संसदेच्या आवारात गुरूवारी अभूतपूर्व स्थिती निर्माण झाली आहे. काँग्रेस आणि भाजपचे खासदार एकमेकांविरोधात उभे ठाकल्यानंतर धक्काबुक्की झाल्याचा आरोप दोन्ही बाजूने केला जात आहे. मात्र, या झटापटीत भाजपच्या एका खासदाराची प्रकृती बिघडल्याने त्यांना थेट अतिदक्षत विभागात दाखल करावे लागले आहे.

भाजपचे खासदार मुकेश राजपूत यांना दिल्लीतील आयएमएल रुग्णालयात आयसीयूमध्ये भरती करण्यात आल्याचे वृत्त एएनआय या वृत्तसंस्थेने दिले आहे. त्याचप्रमाणेच याच रुग्णालयात भाजपचे दुसरे खासदार प्रताप सारंगी यांच्यावर उपचार सुरू आहेत. त्यांच्या डोक्याला गंभीर दुखापत झाली आहे.

लोकसभेतील विरोधी पक्षनेते राहुल गांधी यांनी धक्का दिल्याने राजपूत हे सारंगी यांच्या अंगावर पडले. त्यानंतर सारंगी खाली पडून त्यांच्या डोक्याला दुखापत झाली. तर राजपूत यांनाही दुखापत झाल्याचे सांगितले जात आहे. त्यामुळे दोघांनाही रुग्णालयात दाखल करण्यात आले असून राजपूत यांच्या प्रकृती गंभीर असल्याचे वृत्त एएनआयने दिले आहे.

दरम्यान, दोन्ही खासदारांच्या प्रकृतीची विचारपूस करण्यासाठी केंद्रीय मंत्री शिवराज सिंह चौहान आणि प्रल्हाद जोशी रुग्णालयात दाखल झाले आहे. तर राहुल गांधी यांनी आरोप फेटाळून लावले आहेत. भाजप खासदारांनी आपल्याला संसदेत जाण्यापासून रोखले. त्यांनीच आपल्याला धक्काबुक्की केल्याचा दावा राहुल यांनी केला आहे. दोन्ही बाजूने धक्काबुक्कीचा आरोप होत असल्याने संसद आवारातील वातावरण चांगलेच तापले आहे.

केंद्रीय गृहमंत्री अमित शाह यांनी डॉ. बाबासाहेब आंबेडकर यांचा अपमान केल्याचा आरोप काँग्रेसने केला असून त्यांची राजीनाम्याची मागणी केली जात आहे. त्यासाठी दोन दिवसांपासून संसदेच्या आवारात आंदोलन केले जात आहे. त्याला प्रत्युत्तर म्हणून आज भाजप खासदारांनीही आंदोलनाचा पवित्रा घेतला. यादरम्यान सत्ताधारी आणि विरोधी खासदार आमनेसामने आले होते.