PM Modi : सुप्रीम कोर्टानं राहुल गांधींवर केलेल्या टिप्पणीवर PM मोदींचं मोठं विधान; म्हणाले, स्वतःच कबर...

PM Modi : पंतप्रधान नरेंद्र मोदी यांच्या अध्यक्षतेखाली मंगळवारी एनडीएच्या संसदीय दलाची बैठक पार पडली. या बैठकीत त्यांनी ऑपरेशन सिंदूरवर सविस्तर चर्चा केली. त्याचबरोबर पावसाळी अधिवेशनाबाबतही त्यांनी अनेक मुद्द्यांवर भाष्य केलं. यावेळी सुप्रीम कोर्टानं चीनच्या मुद्द्यावरुन राहुल गांधींना नुकतंच फटकारलं त्यावरही मोदींनी विरोधकांवर निशाणा साधला.

बैठकीत मोदींनी जोरदारपणे विरोधकांना टार्गेट केलं आणि म्हणाले, "राहुल गांधी स्वतःची राजकीय कबर स्वतः खोदत आहेत". काही खासदारांनी नाव न सांगण्याच्या अटीवर सांगितलं की, पंतप्रधानांनी सर्व घटकपक्षांच्या सहकाऱ्यांना हे आश्वासन दिलं की, देश सर्वकाही बघत आहे. कदाचित संसदेत हवं तसं काम होत नसेल पण तरीही बरंच काही सुरु आहे. तसंच देशाची प्रत्येक गोष्टीवर नजर आहे. मोदींनी या बैठकीत खासदारांना नेमकं काय संबोधित केलं याची माहिती काही खासदारांनी इंडियन एक्स्प्रेसशी बोलताना दिली.

मोदींनी आपल्या भाषणाच्या सुरुवातीलाच म्हटलं की, "मी भारताची बाजू मांडण्यासाठी उभा राहिलो आहे. राहुल गांधींबाबतही मोदी या बैठकीत काही गोष्टी बोलले. नुकतेच सुप्रीम कोर्टानं राहुल गांधींच्या चीनसंदर्भातील विधानावरुन फटकारलं. "तुम्ही सच्चे भारतीय असाल तर अशी विधान करणार नाही," असं कोर्टानं राहुल गांधींना म्हटलं होतं. याचा उल्लेख पंतप्रधानांनी आपल्या भाषणात केला.

राहुल गांधींवर हल्लाबोल करताना राहुल गांधींनी भारतीय सैन्याबद्दल अपरिपक्व आणि बेपर्वा विधाने केल्याचा आरोप पंतप्रधान मोदींनी केला. भारताला अखंड ठेवणाऱ्या मूल्यांपासून स्वतःला ते दूर ठेवत आहेत. अशा प्रकारची विधानं ही राष्ट्रीय सुरक्षा कमजोर करते तसंच सैन्य दलांचा अवमान करतात. राहुल गांधी हे स्वतःच स्वतःची राजकीय कबर खोदत आहेत. तसंच भारताच्या अखंडतेच्या मुल्यांपासून स्वतःला दूर नेत आहेत, असंही मोदी यावेळी म्हणाले.

यावेळी ऑपरेशन सिंदूर आणि ऑपरेशन महादेवमध्ये भारतीय सैन्यानं केलेल्या शौर्याच्या कामगिरीच्या अभिनंदनाचा ठराव पास करण्यात आला. यावेळी पहलगाम हल्ल्यात जीव गमावलेल्या २६ नागरिकांची देखील आठवण काढली गेली. तसंच मोदींच्या नेतृत्वाखाली झालेल्या या कारवायांच्या कौतुकाचाही या ठरावात समावेश करण्यात आला.