Rahul Gandhi : स्वातंत्र्यवीर सावरकर टिप्पणी प्रकरण पोहोचले सुप्रीम कोर्टात; राहुल गांधींना मोठा दिलासा

राहुल गांधी यांना स्वातंत्र्यवीर विनायक दामोदर सावरकर यांच्याबाबत केलेल्या कथित वक्तव्याशी संबंधित मानहानी प्रकरणात सुप्रीम कोर्टाने मोठा दिलासा दिला आहे. सावरकर टिप्पणी प्रकरणात राहुल गांधी यांच्याविरोधात दाखल करण्यात आलेली फौजदारी मानहानीची तक्रार आणि संबंधित मजिस्ट्रेटने जारी केलेला समन सुप्रीम कोर्टाने रद्द केला आहे. त्यामुळे राहुल गांधी यांच्यावरील या प्रकरणातील कायदेशीर कारवाईला मोठा धक्का बसला आहे.

सुप्रीम कोर्टातील न्यायमूर्ती दीपांकर दत्ता आणि न्यायमूर्ती शील नागू यांच्या खंडपीठा समोर या प्रकरणाची सुनावणी झाली. खंडपीठाने स्पष्ट केले की, एखाद्या खटल्याच्या पुढील कार्यवाहीसाठी आवश्यक असलेली मंजूरी कायद्यानुसार अनिवार्य असेल आणि ती उपलब्ध नसेल, तर संबंधित प्रकरण पुढे चालवता येत नाही.

या प्रकरणात उत्तर प्रदेश सरकारने सुप्रीम कोर्टात दाखल केलेल्या प्रतिज्ञापत्राचाही न्यायालयाने विचार केला. या प्रतिज्ञापत्रात राहुल गांधी यांच्याविरोधात खटला चालवण्यासाठी आवश्यक मंजुरी देण्यात आल्याचे कोणतेही स्पष्ट उल्लेख आढळले नाहीत. याच आधारावर सुप्रीम कोर्टाने राहुल गांधी यांच्याविरोधातील तक्रार आणि मजिस्ट्रेटचा समन आदेश रद्द करण्याचा निर्णय घेतला.

हे प्रकरण 2023 मध्ये राहुल गांधी यांच्या ‘भारत जोडो यात्रा’दरम्यान महाराष्ट्रात केलेल्या सावरकरांवरील कथित वक्तव्याशी संबंधित होते. राहुल गांधी यांच्या वक्तव्यावर त्यावेळी महाराष्ट्रातील राजकीय वर्तुळात मोठी प्रतिक्रिया उमटली होती. उद्धव ठाकरे यांनीही राहुल गांधी यांच्या भूमिकेवर नाराजी व्यक्त केली होती. सावरकरांचा अपमान केल्यास विरोधकांच्या आघाडीवर परिणाम होऊ शकतो, असा इशाराही त्यांनी दिला होता.

राहुल गांधी यांच्या वक्तव्यावर सावरकरांचे नातू रंजीत सावरकर यांनीही तीव्र प्रतिक्रिया दिली होती. त्यांनी राहुल गांधी राजकीय फायद्यासाठी विनायक दामोदर सावरकरांचा वारंवार अपमान करत असल्याचा आरोप केला होता.

दरम्यान, सुप्रीम कोर्टाच्या आताच्या निर्णयामुळे राहुल गांधी यांना या मानहानी प्रकरणात मोठा कायदेशीर दिलासा मिळाला आहे. सावरकर टिप्पणी प्रकरणातील पुढील राजकीय आणि कायदेशीर चर्चेला या निर्णयामुळे पुन्हा वेग येण्याची शक्यता आहे.