Ram Mandir Donation Scam: राम मंदिरातील देणगी घोटाळ्याची शिवसेना साक्षीदार! संजय राऊतांनी केले गंभीर आरोप

Sanjay Raut serious allegations on Ram Mandir issue: अयोध्येतील राम मंदिराच्या उद्घाटनानंतर मोठ्या प्रमाणावर देणग्यांचा ओघ सुरु झाला होता, पण या देणग्या स्विकारल्यानंतर त्यांचा कुठलाही हिशोब ठेवण्यात आलेला नाही, हे आता उघड झालं आहे.

यामुळं राम मंदिर उभारणीपासून, त्याच्या उद्घाटनावेळी झालेल्या राजकारणापासून ते आता मंदिरात झालेल्या आर्थिक घोटाळ्यापर्यंत कायम चर्चेत राहिलं आहे. याच आर्थिक घोटाळ्याचा शिवसेना देखील साक्षीदार असल्याचा दावा करण्यात आला आहे. त्यासाठी संजय राऊत यांनी राम मंदिर ट्रस्टवर शुक्रवारी गंभीर आरोप केले.

संजय राऊतांनी राम मंदिरातील देणगी घोटाळ्यावर भाष्य करताना म्हटलं की, "अयोध्येतील राम मंदिराच्या उभारणीसाठी शिवसेनेने दान केलेली ४ किलो वजनाची चांदीची वीट बेपत्ता झाल्यामुळे गंभीर प्रश्न निर्माण झाले आहेत.

उद्धव ठाकरे यांनी हजारो शिवसैनिक आणि साधू-संतांच्या उपस्थितीत १ कोटी रुपये आणि ही पवित्र चांदीची वीट सढळ हाताने दान केली होती. तरीही, इतकी वर्षे उलटूनही ट्रस्टकडून त्याबाबत कोणतीही पावती किंवा माहिती मिळालेली नाही. ती वीट नक्की कुठे गेली? आता या प्रकरणाची सखोल चौकशी होऊन जबाबदारी निश्चित करण्याची वेळ आली आहे"

राऊत पुढे म्हणाले, "जे मुख्य गुन्हेगार आहेत ते बाहेर आहेत, ते अद्यापही या ट्रस्टवर काम करत आहेत. तुम्ही स्वतःला हिंदुत्ववादी म्हणवता आणि राम मंदिरात चोरी करता. तुम्ही मंदिराची दानपेटी चोरी करता.

हा पैसा राजकारणात येतो त्याच पैशानं तुम्ही आमदार-खासदारांना खरेदी करता आणि पक्ष फोडता. तेच राम मंदिराचे जे २००० कोटी रुपये तुम्ही चोरले आहेत, त्यातूनच तुम्ही आम आदमी पार्टीचे खासदार फोडले, तृणमूल काँग्रेसचे खासदार फोडले, शिवसेनेचे जे सहा खासदार तुम्ही फोडले त्यासाठी हा मंदिरातलाच लुटलेला पैसा वापरण्यात आला आहे."

"शिवसेनेच्या सहा खासदाराना जे प्रत्येकी ५० कोटी रुपये दिलेत त्यासाठीचा पैसा हा एकनाथ शिंदेंकडं या राम मंदिराच्या दान पेटीतूनच आला असेल. त्याठिकाणी ते चोरीचा माल खूप मोठ्या प्रमाणावर दान देत होते तोच पैसा पुन्हा त्यांच्याकडं पाठवला असेल," अशा शब्दांत संजय राऊत यांनी भाजप आणि शिंदेंच्या शिवसेनेवर घणाघाती टीका केली.