निवडणुकीत तिकीट न मिळाल्याने नेत्यांचे शोलेस्टाईल आंदोलन; थेट टॉवरवरच चढत दिली धमकी

Delhi Municipal Election : दिल्लीत (Delhi) होणाऱ्या महापालिका निवडणुकीत (Municipal Election) तिकीट न मिळाल्याने आम आदमी पक्षाच्या (AAP) एका नेत्याने रविवारी टेलिफोन टॉवरवर चढून फेसबुक लाईव्ह केले. पूर्व दिल्लीचे माजी नगरसेवक हसीब-उल हसन यांनी टॉवरवर चढून आम आदमी पक्षाचे नेते आतिशी आणि दुर्गेश पाठक त्यांची कागदपत्रे परत करत नसल्याचा आरोप केला.

या आरोपांवर 'आप'च्या नेत्यांनी अद्याप कोणतीही प्रतिक्रिया दिलेली नाही. हसन यांनी टॉवरवर चढल्यानंतर सांगितले की जर मी खाली पडलो आणि काही बरे वाईट झाले तर आम आदमी पार्टी आणि आतिशी यांच्यासह दुर्गेश पाठक जबाबदार असतील. हसीब-उल हसन यांनी व्हिडिओमध्ये म्हटले आहे की 'आज मला काही झाले किंवा माझा मृत्यू झाला तर आम आदमी पार्टीचे दुर्गेश पाठक आणि आतिशी जबाबदार असतील. त्यांच्याकडे माझ्या बँकेच्या पासबुकसह माझी मूळ कागदपत्रे आहेत.'

"सोमवारी उमेदवारी अर्ज दाखल करण्याचा शेवटचा दिवस आहे. मात्र, ते मला माझी कागदपत्रे देत नाहीत, हसीब-उल हसनने व्हिडिओमध्ये म्हटले आहे. म्हणाले आहे की, पक्षाने त्यांना निवडणुकीत तिकीट दिले की नाही, याची चिंता नाही, तर त्यांची कागदपत्रे परत हवी आहेत.

हसन यांनी या वर्षाच्या सुरूवातीलाही असेच आंदोलन केले होते. मार्चमध्ये, शास्त्री पार्कमधील गटार साफ करण्यासाठी त्यांनी नाल्यात उडी मारली होती. नाल्यात उडी मारून त्यांनी अनोखे आंदोलन केले होते. त्यामुळे ते वेगळ्या आंदोलनासाठी ओळखले जातात. मात्र, महापालिका निवडणुकीत तिकिट न मिळाल्यामुळे त्यांनी टॉवरवर चढत आंदोलन केले.