सहा लाख महागात पडले; काँग्रेस आमदाराला तीन वर्षांचा कारावास

रांची : झारखंड काँग्रेसला (Congress) मोठा धक्का बसला आहे. पक्षाचे सह कार्यकारी अध्यक्ष व आमदार बंधू तिर्की (Bandhu Tirkey) यांना सीबीआय (CBI) न्यायालयाने बेहिशेबी मालमत्ता प्रकरणात तीन वर्षांची सश्रम कारावासाची शिक्षा सुनावली आहे. त्यांना तीन लाखांचा दंडही ठोठावण्यात आला आहे. ही शिक्षा झाल्यानं तिर्की यांना आमदारकीही गमवावी लागू शकते. ते माजी मंत्री असून तीनवेळा आमदार म्हणून निवडून आले आहेत.

सीबीआयच्या विशेष न्यायालयाचे न्यायाधीश पी. के. शर्मा यांनी ही शिक्षा सुनावली. उत्पन्नापेक्षा सहा लाखांची बेहिशेबी संपत्ती आढळून आल्याने तिर्की यांना दोषी धरण्यात आले होते. त्यांनी तीन लाखांचा दंड न भरल्यास आणखी सहा महिने तुरूंगात राहावे लागेल. कायद्यानुसार दो वर्षांपेक्षा जास्त शिक्षा झाल्यास आमदारकी (MLA) रद्द होऊ शकते. त्यामुळे आता तिर्की यांच्या अडचणी वाढल्या आहेत.

काय आहे प्रकरण?

बंधू तिर्की यांच्यावर सहा लाख 28 हजार 698 रुपयांची बेहिशेबी संपत्ती बाळगल्याचा आरोप होता. या प्रकरणात सीबीआयने त्यांना 12 डिसेंबर 2018 रोजी अटक केली होती. सुमारे 40 दिवस ते तुरूंगात होते. त्यानंतर उच्च न्यायालयाने त्यांना जामीन मंजूर केला. सीबीआयने तिर्की यांच्या कोडा घोटाळ्याप्रकरणी 11 ऑगस्ट 2010 मध्ये प्राथमिक गुन्हा दाखल केला होता.तर 16 जानेवारी 2019 रोजी आरोप निश्चित करण्यात आले होते.

सोमवारी तिर्की यांना शिक्षा सुनावली. तिर्की यांनी मार्च 2005 ते जून 2009 या कालावधीत आमदार असताना उत्पन्नापेक्षा जास्त संपत्ती जमा केली होती, असा आरोप सीबीआयने केला होता. या प्रकरणात सीबीआयने 21 साक्षीदार तर बचाव पक्षाकडून आठ साक्षीदार होते. डिसेंबर 2019 मध्ये या प्रकरणाची सुनावणी सुरू झाल्यानंतर तिर्की यांनी त्यांची बाजू मांडली होती. कोरोनामुळे सुनावणी लांबली होती.

तिर्की हे काँग्रेसचे ज्येष्ठ नेते असून सध्या सह कार्यकारी अध्यक्ष आहेत. त्यामुळे झारखंड काँग्रेसला धक्का बसला आहे. तीन वेळा आमदार आणि माजी मंत्री असलेल्या तिर्की यांची आमदारकीही धोक्यात आली आहे. त्यांना या शिक्षेविरोधात उच्च न्यायालयात दाद मागता येऊ शकते. तसेच ते जामीनासाठीही अर्ज करू शकतात. झारखंडमध्ये काँग्रेस पक्ष झारखंड मुक्ती मोर्चासोबत सत्तेत आहे.