Ajit Pawar : अजित पवारांना 'सुप्रीम' नोटीस; राष्ट्रवादी आमदार अपात्रतेवर कोर्टात नेमकं काय झालं?

Maharashtra Political News : राष्ट्रवादी काँग्रेस पक्ष फुटीनंतर विधानसभा अध्यक्ष राहुल नार्वेकर यांच्या आमदार अपात्रता प्रकरणाच्या निर्णयाविरोधात शरद पवार गटाने दाखल केलेल्या याचिकेवर आज सर्वोच्च न्यायालयात सुनावणी पार पडली.

या सुनावणीत शिवसेना आणि राष्ट्रवादीच्या आमदार अपात्रतेची प्रकरणे एकाच दिवशी ऐकू असे मुख्य न्यायाधीश धनंजय चंद्रचूड यांनी स्पष्ट केले. त्यानुसार कोर्टाकडून अजित पवार यांच्यासह त्यांना साथ देणाऱ्या आमदारांना नोटीस पाठवली आहे.

सुप्रीम कोर्टात दाखल याचिकेत जयंत पाटील Jayant Patil यांनी अजित पवार यांच्यासह त्यांच्यासोबत गेलेल्या आमदारांना अपात्र करण्याची मागणी केली आहे. या याचिकेवर सोमवारी सर्वोच्च न्यायालयात सुनावणी पार पडली.

या सुनावणीत कोर्टाने शिवसेना आणि राष्ट्रवादी आमदार अपात्रेतीची दोन्ही प्रकरणे एकाच दिवशी ऐकू, असे सांगितले. तसेच कोर्टाने पुढील सुनावणी ३ सप्टेंबर रोजी होईल, असे स्पष्ट केले.

राज्यात दोन वर्षांत दोन मोठे पक्ष फुटले. फुटीर गटांतील आमदारांवर अपात्रतेची कारवाई करावी, अशी याचिका मागे उरलेल्या दोन्ही पक्षांकडून सर्वोच्च न्यायालयात करण्यात आल्या आहेत. या याचिकांवर गेल्या अनेक महिन्यांपासून सुनावणी झालेली नाही.

आता झालेल्या सुनावणीत दोन्ही प्रकरणे एकापाठोपाठ ऐकू असे कोर्टाने सांगितले आहे. त्यामुळे या प्रकरणी होणाऱ्या पुढील 3 सप्टेंबर रोजी होणाऱ्या सुनावणीत कोर्ट मोठा निर्णय घेण्याची शक्यता असल्याची चर्चा सुरू झाली आहे.

दरम्यान, राष्ट्रवादी काँग्रेस फुटली आणि निवडणूक आयोगाने पक्ष आणि घड्याळ हे चिन्ह उपमुख्यमंत्री अजित पवार Ajit Pawar यांच्या नेतृत्वातील गटाला दिले. यावर आठवड्यापूर्वी झालेल्या सुनावणीत कोर्टाने अजित पवार गटाला राष्ट्रवादी काँग्रेस नाव आणि चिन्हाबाबत दोन आठवड्यात आपले उत्तर द्यावे सादर करण्याचे आदेश दिले आहेत.

तसेच अजित पवार गटाच्या उत्तरावर शरद पवार गटालाही आपले म्हणणे मांडण्यासाठी कोर्टाने आठवड्याचा कालावधी दिला आहे. आता चिन्ह आणि पक्षाबाबत पुढील सुनावणी 6 ऑगस्ट रोजी होणार आहे.