Tejashwi Yadav : कुटुंब फुटूनही तेजस्वीच उत्तराधिकारी : लालूप्रसाद यादवांकडून तोंडभरुन कौतुक, दिली महत्वाची जबाबदारी

बिहार विधानसभा निवडणुकीत एनडीएने जोरदार कामगिरी करत मोठी आघाडी घेतली. भाजपने घौडदौड करत विजयाचे लक्ष्य पार केले. दुसरीकडे महागठबंधनला अपेक्षेपेक्षा मोठा धक्का बसला असून त्यांना दारूण पराभवाचा सामना करावा लागला. या राजकीय पार्श्वभूमीवर आता एक महत्त्वाची माहिती समोर आली आहे.

'राजेडी'चे युवा नेते तेजस्वी यादव हे पुढील काळातही विरोधी पक्षनेते म्हणून काम पाहणार आहेत. स्वतः पक्षप्रमुख लालू प्रसाद यादव यांनी जाहीर केली असून आगामी राजकीय धोरणेही तेजस्वी यांच्या मार्गदर्शनाखालीच ठरवली जाणार आहेत.

पटणामध्ये झालेल्या महत्त्वाच्या बैठकीत लालू प्रसाद यादव, राबडी देवी, मीसा भारती, माजी प्रदेशाध्यक्ष जगदानंद सिंह यांच्यासह अनेक वरिष्ठ नेते उपस्थित होते. या बैठकीत निवडणुकीतील पराभवाची सविस्तर चर्चा करण्यात आली. लालू प्रसाद यांनी बैठकीत स्पष्टपणे सांगितले की ''तेजस्वी यांनी पक्षाला पुढे नेले आहे आणि पुढेही 'राजेडी'चे महत्त्वाचे निर्णय तेच घेतील."

सुमारे चार तास चाललेल्या या चर्चेमध्ये तेजस्वी यादव यांनी विजयी आणि पराभूत उमेदवारांशी संवाद साधला. निवडणूक निकालांचा तपशीलवार आढावा घेतला गेला. यावेळी निकाल कोर्टात नेण्याचा पर्यायही चर्चेत आला असून महागठबंधनच्या इतर नेत्यांशी चर्चा करून यावर पुढील निर्णय घेतला जाणार आहे.