BJP's Big Victory : मोठी बातमी! निवडणुकीआधीच भाजपला मोठं यश; 77 उमेदवार बिनविरोध, त्रिपुरात विजयाचा धमाका

Tripura Election News : त्रिपुरामध्ये शहरी स्थानिक स्वराज्य संस्थांच्या निवडणुकीपूर्वीच भारतीय जनता पक्षाने मोठे यश मिळवले आहे. येत्या २७ नोव्हेंबर रोजी होणाऱ्या निवडणुकीआधी भाजपचे तब्बल ७७ उमेदवार बिनविरोध निवडून आले आहेत. उमेदवारी अर्ज मागे घेण्याची प्रक्रिया पूर्ण झाल्यानंतर त्रिपुरा राज्य निवडणूक आयोगाने ही घोषणा केली. त्यामुळे प्रत्यक्ष मतदानापूर्वीच भाजपने ७७ जागांवर विजय मिळवला आहे. मात्र, या बिनविरोध निवडीवरून राजकीय वातावरण चांगलेच तापले असून, काँग्रेस आणि सीपीआयएमने सत्ताधारी भाजपवर विरोधी उमेदवारांना धमकावल्याचा गंभीर आरोप केला आहे.

पाच नगरपालिकांमध्ये भाजपचे ६५ उमेदवार बिनविरोध

सामवर आलेल्या वृत्तानुसार, दक्षिण त्रिपुरा जिल्ह्यातील शांतीर बाजार, पश्चिम त्रिपुरा जिल्ह्यातील रणीर बाजार, तसेच धलाई जिल्ह्यातील कमालपूर, जिरानिया आणि मोहनपूर या पाच नगरपालिकांमध्ये इतर कोणत्याही राजकीय पक्षाने उमेदवार उभे केले नाहीत. यामुळे या पाच नगरपालिकांमधील एकूण ६५ जागांवर भाजपचे उमेदवार बिनविरोध निवडून आले. याशिवाय धलाई जिल्ह्यातील अंबासा, सिपाहिजाला जिल्ह्यातील बिशालगढ आणि खोवाई जिल्ह्यातील तेलियामुरा या तीन नगरपालिकांमध्ये भाजपने आणखी १२ जागा बिनविरोध जिंकल्या. अशा प्रकारे निवडणुकीपूर्वीच भाजपच्या खात्यात ७७ जागा जमा झाल्या आहेत.

भाजपवर विरोधकांचे गंभीर आरोप

भाजपच्या या बिनविरोध विजयावर विरोधी पक्ष सीपीआयएम आणि काँग्रेसने प्रश्नचिन्ह उपस्थित केले आहे. सत्ताधारी पक्षाच्या कार्यकर्त्यांनी विरोधी पक्षांच्या उमेदवारांना धमकावल्यामुळे अनेक ठिकाणी त्यांना निवडणुकीच्या रिंगणात उतरता आले नाही, असा आरोप दोन्ही पक्षांनी केला आहे. सीपीआयएमचे त्रिपुरा राज्य सचिव आणि विरोधी पक्षनेते जितेंद्र चौधरी यांनी भाजपवर गंभीर आरोप केले आहेत. डाव्या पक्षांच्या उमेदवारांना निवडणूक लढवण्यापासून रोखण्यासाठी भाजप कार्यकर्त्यांनी पक्षाचे नेते, उमेदवार आणि समर्थकांवर हल्ले केल्याचा दावा त्यांनी केला. मात्र, या आरोपांवर भाजपची अधिकृत भूमिका काय आहे, हे स्पष्ट होणे बाकी आहे.

काँग्रेस-सीपीआयएम एकत्र येण्याचे प्रयत्न अपयशी

२७ नोव्हेंबर रोजी होणाऱ्या शहरी स्थानिक स्वराज्य संस्थांच्या निवडणुकीत भाजपला आव्हान देण्यासाठी सीपीआयएम आणि काँग्रेसने एकत्र निवडणूक लढवण्याचा प्रयत्न केला होता. यासाठी दोन्ही पक्षांमध्ये अनेक बैठका आणि चर्चेच्या फेऱ्या झाल्या. मात्र, जागावाटप आणि आघाडीबाबत कोणताही ठोस निर्णय होऊ शकला नाही. त्यामुळे दोन्ही पक्षांना एकत्रितपणे निवडणूक लढवता आले नाही.

१६ स्थानिक स्वराज्य संस्थांमध्ये होणार मतदान

त्रिपुरातील या निवडणुका राजकीयदृष्ट्या महत्त्वाच्या मानल्या जात आहेत. राज्यातील आठ जिल्ह्यांमधील एकूण २१ शहरी स्थानिक स्वराज्य संस्थांपैकी १६ संस्थांमध्ये २७ नोव्हेंबर रोजी मतदान होणार आहे. यापूर्वी भाजपने त्रिपुरातील विधानसभा पोटनिवडणुकांमध्येही विजय मिळवला होता. आता स्थानिक स्वराज्य संस्थांच्या निवडणुकीतही भाजपने मतदानापूर्वीच ७७ जागा जिंकल्याने पक्षाचा आत्मविश्वास वाढला आहे. मात्र, विरोधकांनी केलेल्या धमकी आणि हल्ल्यांच्या आरोपांमुळे या निवडणुकीकडे संपूर्ण देशाचे लक्ष लागले आहे.