Nicolas Maduro arrest : थेट ट्रम्प यांना चॅलेंज दिलेल्या राष्ट्रपतींना पत्नीसह अटक; अमेरिकेच्या हल्ल्याने जग हादरलं, गंभीर पडसाद उमटणार?

Venezuela global impact : अमेरिकेचे राष्ट्राध्यक्ष डोनाल्ड ट्रम्प यांनी जगात खळबळ उडवून देणारे मिशन तडीस नेले आहे. अमेरिकन सैन्याने व्हेनेझुएलाचे राष्ट्रपती निकोल मादुरो आणि त्यांच्या पत्नी सिलिया फ्लोर्स यांना अटक केली आहे. त्यामुळे संपूर्ण जग हादरलं आहे. आता व्हेनेझुएलामध्ये सत्ता परिवर्तन होईपर्यंत अमेरिकाच्या ताब्यात हा देश राहिले, असेही टॅम्प यांनी स्पष्ट केले आहे. दरम्यान, या घटनेचे जगभरात पडसाद उमटण्याची भीती व्यक्त केली जात आहे.

मादुरो आणि त्यांच्या पत्नीला विशेष सैन्य मोहिमेच्या माध्यमातून देशातून बाहेर काढले असल्याची माहिती ट्रम्प यांनी दिली आहे. त्यांनी याबाबतचे फोटोही सोशल मीडियात पोस्ट केले आहेत. दोघांनाही विशेष विमानाने अमेरिकेत आणण्यात आले आहे. या मिशनला साऊदर्न स्पीअर असे नाव देण्यात आले होते. अमेरिकी स्पेशल फोर्सने हे मिशन यशस्वी केले.

अमेरिकेने यापूर्वीच मादुरो यांच्यावर कोट्यवधी रुपयांचा इनाम जाहीर केला होता. मादुरो यांनीही ट्रम्प यांना मला पकडून दाखवा, असे चॅलेंज दिले होते. त्यानंतर अमेरिकेने मध्यरात्री राबविलेल्या मिशनमध्ये व्हेनेझुएसला अचानक हल्ला करण्यात आला. या हल्ल्यात आतापर्यंत ४० लोकांचा मृत्यू झाल्याची माहिती आहे. प्रामुख्याने कराकसमध्ये मोठ्या प्रमाणात नुकसान झाले आहे. तिथले जनजीवन विस्कळीत झाले आहे.

अमेरिकेने मादुरो यांच्यावर ड्रग तस्करी आणि दहशतवादाचे आरोप ठेवले आहेत. २०२० मध्येच हे आरोप करण्यात आले होते. ते २०१३ पासून व्हेनेझुएलाचे राष्ट्रपती आहेत. सध्या हा देश आर्थिक संकटातून जात असल्याचा दावा केला जात आहे. मानवाधिकारांचेही मोठ्या प्रमाणात उल्लंघन झाल्याचा आरोपही होत आहे. ट्रम्प यांच्या पहिल्या कार्यकाळातच मादुरो यांना पकडण्यासाठी मिशन तयार करण्यात आल्याचा दावाही आता केला जात आहे.

असे झाले मिशन पूर्ण

मागील काही महिन्यांपासून मिशनची तयारी सुरू होती. सीआयएची टीम स्थानिक वेळेनुसार शनिवारी सकाळी व्हेनेझुएलामध्य घुसली आणि हल्ला केला. या मिशनमध्ये अमेरिकेची १५० विमाने होती. मादुरो आणि त्यांची पत्नी असलेल्या ठिकाणांवर अमेरिकी सैन्याला लक्ष्य केले. सैन्याने दोघांनाही ताब्यात घेत थेट इवो जिमा या युध्दनौकेवर नेण्यात आले. त्यानंतर त्यांना अमेरिकेते आणून न्यूयॉर्कमधील जेलमध्ये ठेवण्यात आले आहे.

दरम्यान, मादुरो यांच्या अटकेनंतर आता जगभरातून प्रतिक्रिया उमटत आहे. अमेरिकेतील विरोधी पक्षांनी ट्रम्प यांच्यावर टीका केली आहे. काही देशांनी समतोल भूमिका घेत ट्रम्प यांना थेट विरोधी करण्याचे टाळले आहे. मात्र, व्हेनेझुएलातील अस्थिर राजकीय स्थितीचा फटका संपूर्ण जगाला बसण्याची भीती आता व्यक्त केली जात आहे.

व्हेनेझुएलामध्ये जगातील सर्वात मोठा तेलसाठा आहे. या घटनेमुळे तेलाच्या किंमती ६ ते ७ टक्क्यांनी वाढण्याची भीती व्यक्त केली जात आहे. ट्रम्प यांनी आता व्हेनेझुएलामध्ये सत्तांतर होईपर्यंत अमेरिकेचे वर्चस्व राहणार असल्याचे स्पष्ट केले आहे. त्यामुळे आता अमेरिका संपूर्ण स्थिती कशी आटोक्यात आणणार याकडे जगाचे लक्ष लागले आहे.