US voter fraud : अमेरिकेत दोन भारतीयांकडून बोगस मतदान; नागरिक नसतानाही नोंदणी केल्याचा आरोप

US election fraud case : अमेरिकेत नोव्हेंबर २०२४ मध्ये झालेल्या राष्ट्राध्यक्षपदाच्या निवडणुकीत हजारो बोगस मतदारांनी मतदान केल्याचे तपासात उघड झाले आहे. त्यामध्ये दोन भारतीयांचाही समोवश असल्याची माहिती समोर आली आहे. कॅलिफोर्नियामध्ये निवडणूक फसवणुकीच्या आरोपाखाली अटक करण्यात आलेल्या २८ ग्रीन कार्ड धारकांमध्ये या दोन भारतीयांचा समावेश आहे.

अमेरिकेच्या न्याय विभागाने सोमवारी एका निवेदनातून ही माहिती दिल्याचे वृत्त एनडीटीव्हीने दिले आहे. विभागाच्या माहितीनुसार, अमनदीप कौर आणि कमलेश शाह यांच्यावर फसवणुकीचा आरोप आहे. फसवणुकीचा आरोप असलेल्या २८ जणांपैकी ११ जणांना 'ऑपरेशन प्रोटेक्ट द व्होट' अंतर्गत सोमवारी पहाटे अटक करण्यात आली आहे. त्यामध्ये या दोन भारतीयांचा समावेश आहे की नाही, याबाबत स्पष्टता नाही.

दरम्यान, शाह हे सॅक्रामेंटोचे तर कौर हे रँचो पालोस व्हर्डेस येथील रहिवासी आहेत. अमेरिकेचे नागरिकत्व मिळविण्याच्या प्रयत्नात असलेल्या कौर यांनी डिसेंबर २०२२ मध्ये मतदार म्हणून नोंदणी केली होती. त्यांनी निवडणुकीत मतदानही केले होते. तर शाह यांनी निवडणुकीच्या दिवशी मतदार म्हणून नोंदणी आणि मतदानही केले, अशी माहिती न्याय विभागाने दिली आहे.

फसवणुकीचा आरोप असलेले सर्व २८ परदेशी नागिरक असून अमेरिकेत कायदेशीर कायमस्वरूपी रहिवासी किंवा 'ग्रीन कार्ड' धारक आहेत. त्यांना कायदेशीर रहिवासी असल्याचा दर्जा मिळाला असला तरी अमेरिकेचे नागरिकत्व नसल्याने निवडणुकीत मतदान करता येत नाही, असेही न्याय विभागाने स्पष्ट केले आहे.

नागरिकत्वाच्या अर्जात खोटी माहिती देण्यासह फसवणूक करून मतदार नोंदणी आणि मतदानाचे गंभीर आरोप त्यांच्यावर ठेवण्यात आले आहेत. त्यासाठी पाच वर्षांपर्यंतच्या तुरुंगवासाच्या शिक्षेची तरतुद आहे. असे सुमारे २० हजारांहून अधिक जण मतदार म्हणून नोंदणी केलेल्यांच्या यादीत आहेत. न्याय विभागाने वर्षभरात आतापर्यंत विविध प्रकरणांमध्ये ९० जणांवर आरोप ठेवले होते, त्यापैकी ५० जणांनी नागरिकत्व नसताना मतदान केल्याचा आरोप आहे.