US Presidential Elections : कोण जिंकणार, कमला हॅरिस की डोनाल्ड ट्रम्प? फेमस पाणघोड्याने दिले मोठे संकेत

New Delhi : अमेरिकेच्या राष्ट्राध्यक्षपदी कोण विराजमान होणार, याची उत्सुकता संपूर्ण जगाला लागली आहे. डेमोक्रेटिक पक्षाच्या कमला हॅरिस निवडणुकीत इतिहास घडवणार की रिपब्लिकन पक्षाचे उमेदवार डोनाल्ड टॅम्प दुसऱ्यांदा राष्ट्राध्यक्ष होणार, हे लवकरच समजेल. पण त्याआधीच थायलडमधील एका प्रसिध्द पाणघोड्याने याबाबत मोठे संकेत दिले आहेत.

थायलंडमधील खाओ खेओ खुल्या प्राणीसंग्रहालयात मू डेंग हा प्रसिध्द पाणघोडा आहे. सोशल मीडियात आधीपासूनच मू डेंग प्रसिध्द आहे. आता पुन्हा एकदा तो चर्चेत आला आहे. अमेरिकेच्या राष्ट्राध्यक्षपदाच्या पार्श्वभूमीवर प्राणीसंग्रहालयात एक अनोखा प्रयत्न करण्यात आला.

प्राणीसंग्रहालयात मू डेंगसाठी दोन टरबूज ठेवण्यात आले. एका टरबुजावर डोनाल्ड ट्रम्प आणि एकावर कमला हॅरिस यांचे नाव लिहिण्यात आले होते. त्यानंतर हे टरबूज खाण्यासाठी मू डेंग पाण्यातून बाहेर आला. त्याने दोनपैकी एका टरबुजाकडे धाव घेतली. त्यावर डोनाल्ड ट्रम्प यांचे नाव लिहिले होते. याआधारे मू डेंगने डोनाल्ड ट्रम्प विजयी होतील, अशी भविष्यवाणी केल्याचे मानले जात आहे.

मू डेंगचा हा व्हिडिओ सोशल मीडियात व्हायरल होत आहे. यावर्षी जुलै महिन्यातच मू डेंगचा जन्म झाला आहे. त्याचे व्हिडिओ सोशल मीडियात खूप पाहिले जातात. त्यामुळे अमेरिकेच्या राष्ट्राध्यक्षपदाच्या निवडणुकीबाबत केलेली भविष्यवाणीही चर्चेत आली आहे.

दरम्यान, डोनाल्ड ट्रम्प आणि कमला हॅरिस यांच्यामध्ये काँटे की टक्कर आहे. प्री पोलमध्ये दोन्ही नेत्यांना मिळू शकणाऱ्या मतांमध्ये फारसे अंतर नाही. काही सर्व्हेमध्ये ट्रम्प तर काही सर्व्हेमध्ये हॅरिस आघाडीवर आहेत. आता प्रत्यक्ष मतदानाला सुरूवात झाली असून काही तासांत निकाल येण्यासही सुरूवात होईल. यामध्ये कोण बाजी मारणार, हे लवकरच स्पष्ट होईल.