INDIA Alliance : मुख्यमंत्र्याची पक्षासह इंडिया आघाडीत एन्ट्री, अधिकृत भूमिका जाहीर

Vijay TVK : इंडिया आघाडीबाबत मोठी अपडेट समोर आली आहे. डीएमके हा इंडिया आघाडीतून बाहेर पडला असून तामिळनाडूचे मुख्यमंत्री सी. जोसेफ विजय यांच्या नेतृत्वाखालील तामिळनाडू वेत्री कळघम ने 'इंडीया' आघाडीत सामील होण्याची अधिकृत घोषणा केली आहे.

चेन्नईतील काँग्रेसचे मुख्यालय, सत्यमूर्ती भवन येथे झालेल्या आघाडीच्या बैठकीत सहभागी होऊन टीव्हीकेच्या दोन मंत्र्यांनी औपचारिकपणे आघाडीचा शुभारंभ केला. चेन्नईतील या महत्त्वाच्या बैठकीत टीव्हीकेचे निवडणूक व्यवस्थापन महासचिव आणि मंत्री आधार अर्जुन आणि अर्थमंत्री मेरी विल्सन यांनी पक्षाचे प्रतिनिधित्व केले.

तामिळनाडू काँग्रेस कमिटीचे अध्यक्ष माणिकम टागोर म्हणाले की, इंडिया आघाडीसाठी हा ऐतिहासिक दिवस आहे. CM विजय यांच्या निर्णयामुळे संपूर्ण आघाडी आणखी मजबूत होईल.

ज्ञानेश कुमार यांच्या विरोधात आंदोलन

या बैठकीत निवडणूक आयोग आणि मुख्य निवडणूक आयुक्त ज्ञानेश कुमार यांच्या विरोधात 'इंडीया' आघाडी राज्यभरात जिल्हास्तरीय जोरदार आंदोलने करेल, असा निर्णय बैठकीत घेण्यात आला.

निवडणूक आयोगाने विशेष सखोल पुनरीक्षण प्रक्रियेदरम्यान मनमानी आणि बेकायदेशीरपणे काम केले आहे, ज्यामुळे १३ कोटींहून अधिक मतदारांची नावे मतदार यादीतून वगळण्यात आली आहेत, असा आरोप या बैठकीत करण्यात आला.