Ahilyadevi Holkar Farm Loan Waiver Scheme : महाराष्ट्रातील शेतकरी कर्जमाफी योजनेच्या अंमलबजावणीदरम्यान मोठा गोंधळ समोर आला आहे. काही व्यापारी बँकांनी सादर केलेल्या कर्जखात्यांच्या माहितीत मोठ्या प्रमाणात तफावत आणि तांत्रिक चुका आढळल्याने तब्बल 5.5 लाख शेतकरी कर्जखात्यांचे विशेष ऑडिट करण्याचा निर्णय घेण्यात आला आहे. त्यामुळे कर्जमाफीच्या पुढील टप्प्याला काही काळ विलंब होण्याची शक्यता आहे.
कर्जमाफीसाठी बँकांकडून सादर करण्यात आलेल्या आकडेवारीची शासनाच्या नोंदींशी पडताळणी करण्यात आली. त्यावेळी काही बँकांनी दाखवलेली थकीत कर्जाची रक्कम आणि शासनाच्या नोंदीतील प्रत्यक्ष कर्जरक्कम यामध्ये मोठी तफावत असल्याचे समोर आले. याशिवाय कर्जदारांची नावे, बँक खाते क्रमांक आणि कर्जप्रकरणाच्या तपशीलातही विसंगती आढळली.
या प्रकरणात काही व्यापारी बँकांकडून व्याजाची जादा आकारणी करण्यात आल्याचा संशय व्यक्त करण्यात आला आहे. त्यामुळे शासनावर चुकीच्या किंवा अवाजवी व्याजाच्या रकमेचा आर्थिक भार पडू नये, यासाठी संबंधित याद्या बँकांकडे परत पाठवून त्यातील त्रुटी दुरुस्त करण्याच्या सूचना देण्यात आल्या आहेत. त्यानंतर प्रत्येक कर्जखात्याची तपासणी केली जाणार आहे.
सहकार विभागाचे आयुक्त दीपक तावरे यांनी दिलेल्या माहितीनुसार, 4 ते 5 व्यापारी बँकांकडून सादर करण्यात आलेल्या याद्यांमध्ये मोठ्या प्रमाणात लेखा आणि तांत्रिक त्रुटी आढळल्या आहेत. त्यामुळे या सर्व खात्यांची सखोल तपासणी केली जात आहे.
दरम्यान, महाराष्ट्र सरकारच्या शेतकरी कर्जमाफी योजनेत सुमारे 56 लाख शेतकऱ्यांना लाभ देण्याचे नियोजन आहे. मात्र, बँकांकडून आलेल्या माहितीतील त्रुटींमुळे पात्र लाभार्थ्यांची अंतिम यादी निश्चित करण्यापूर्वी खात्यांची पुन्हा पडताळणी केली जात आहे. त्यामुळे साडेपाच लाख कर्जखात्यांच्या विशेष ऑडिटचा निर्णय शेतकऱ्यांसाठी महत्त्वाचा ठरला आहे.
शासनाकडून आता बँकांच्या नोंदी आणि उपलब्ध अधिकृत माहिती यांचा मेळ घालण्यात येत आहे. तपासणी पूर्ण झाल्यानंतर पात्र शेतकऱ्यांना कर्जमाफीचा लाभ देण्याची प्रक्रिया पुढे नेली जाणार आहे. त्यामुळे संबंधित शेतकऱ्यांनी कर्जखात्याची माहिती आणि कर्जमाफीच्या यादीतील तपशील तपासणे महत्त्वाचे ठरणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.