Four reasons behind Ladki Bahin installment delay: मुख्यमंत्री लाडकी बहीण योजनेच्या हप्त्यांबाबत राज्यभरात विविध चर्चा सुरू असताना महिला आणि बाल विकास मंत्री अदिती तटकरे यांनी महत्त्वाचे स्पष्टीकरण दिले आहे. योजनेतील कोणत्याही पात्र महिलेला अन्याय होऊ दिला जाणार नाही, असा ठाम विश्वास त्यांनी व्यक्त केला आहे. तसेच अर्ज रद्द झाल्याच्या चर्चांमध्ये अनेक गैरसमज पसरल्याचेही त्यांनी सांगितले.
अदिती तटकरे म्हणाल्या की, सुमारे 80 लाख महिलांचे अर्ज थांबले असल्याचा अर्थ ते सर्व अर्ज अपात्र ठरले आहेत असा होत नाही. यातील मोठ्या संख्येने लाभार्थींनी वेळेत ई-केवायसी प्रक्रिया पूर्ण केलेली नव्हती. शासनाने ई-केवायसीसाठी तब्बल 8 ते 10 महिन्यांचा कालावधी दिला होता. मात्र, अनेकांनी ही प्रक्रिया पूर्ण केली नसल्यामुळे त्यांच्या खात्यात रक्कम जमा होऊ शकली नाही.
याशिवाय अर्जांची पडताळणी करताना काही महत्त्वाच्या बाबी समोर आल्या आहेत. आयकर विभागाकडून मिळालेल्या माहितीनुसार सुमारे 11.5 ते 12 लाख अर्जदारांचे वार्षिक उत्पन्न निर्धारित मर्यादेपेक्षा जास्त असल्याचे आढळले. तसेच 4.75 ते 5 लाख महिलांचे वय 65 वर्षांपेक्षा अधिक असल्याचे निदर्शनास आले. आरटीओच्या नोंदींनुसार 3.25 लाखांहून अधिक लाभार्थी महिलांच्या नावावर वाहने नोंदणीकृत आहेत.
दरम्यान, जवळपास 14,500 शासकीय कर्मचारी या योजनेचा लाभ घेत असल्याचेही तपासात समोर आले आहे. या प्रकरणात शासनाने संबंधितांकडून रकमेची वसुली करण्याची प्रक्रिया सुरू केली आहे.
मंत्र्यांनी स्पष्ट केले की, ज्या महिलांनी ई-केवायसी पूर्ण केली आहे किंवा वाहन नसतानाही त्यांचे हप्ते थांबले असतील, त्यांनी तातडीने महिला व बाल विकास विभागाशी संपर्क साधावा. अशा सर्व प्रकरणांची फेरतपासणी करून पात्र महिलांना पुन्हा लाभ दिला जाईल.
तसेच संजय गांधी निराधार योजना आणि लाडकी बहीण योजना या दोन्ही योजनांमध्ये लाभ घेणाऱ्या महिलांनाही किमान एका योजनेचा लाभ मिळेल याची सरकार काळजी घेणार असल्याचे त्यांनी सांगितले.
मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या नेतृत्वाखालील सरकार प्रत्येक पात्र लाडक्या बहिणीपर्यंत योजनेचा लाभ पोहोचवण्यासाठी कटिबद्ध असल्याचे अदिती तटकरे यांनी नमूद केले. फेब्रुवारी आणि मार्च महिन्यांचे थकीत हप्ते वितरित करण्याची प्रक्रिया गेल्या आठवड्यापासून सुरू झाल्याची माहितीही त्यांनी दिली.