Maharashtra Government : दुष्काळ आढाव बैठक की जनतेची थट्टा? मराठवाड्यात काजू-बदाम अन् विदर्भात मोबाईलवर टाईमपास

Akola News : राज्यात पावसाळा संपत आला असून गेल्या महिन्यांपासून पावसाने दडी मारली आहे. सप्टेंबर महिना संपत आला तरी देखील समाधानकारक पाऊस झालेला नाही. त्यामुळे राज्यात दुष्काळसदृश्य परिस्थिती असून, शेतकऱ्यांचे डोळे आता सरकारच्या मदतीकडे लागले आहेत.

या पार्श्वभूमीवर शनिवारी नांदेडमध्ये दुष्काळ आढावा बैठक आयोजित करण्यात आली होती. पण या बैठकीप्रसंगी खासदार व लोकप्रतिनिधींनी काजू-बदाम खाण्यावर भर दिल्याचा प्रकार समोर आला होता. या प्रकारानंतर रविवारी अकोल्यातही अधिकाऱ्यांचा असंवेदनशील चेहरा पुन्हा समोर आला आहे. अमरावती विभागीय आढावा बैठकीप्रसंगी अधिकारी मोबाईलमध्ये व्यस्त असल्याने प्रशासनाकडून जनतेची थट्टा केली जात आहे का? असा सवाल उपस्थित होत आहे.

डॉ. पंजाबराव देशमुख कृषी विद्यापीठातील ठाकरे सभागृहात रविवारी कृषिमंत्री दत्तात्रय भरणे यांच्या अध्यक्षतेखाली अमरावती विभागातील दुष्काळी परिस्थितीचा आढावा घेण्यात आला. या बैठकीला जलसंधारण मंत्री संजय राठोड, कामगार खात्याचे मंत्री, अकोला जिल्ह्याचे पालकमंत्री आकाश फुंडकर, आदिवासी मंत्री अशोक उईके, सार्वजनिक बांधकाम विभागाचे राज्यमंत्री इंद्रनील नाईक उपस्थित होते तर आरोग्य खात्याच्या राज्यमंत्री मेघना बोर्डीकर ऑनलाइन उपस्थित होत्या. अमरावती विभागातील सर्वपक्षीय खासदार आणि आमदारांनीही बैठकीत सहभाग घेतला होता.

ही बैठक सुरू असातना उपस्थित अधिकारी मोबाईल पहाण्यात व्यस्त होते. कोणी व्हॉट्सअप पहात होते, तर कोणी फेसबुक पहात होते. यावरून अधिकारी शेतकऱ्यांबद्दल किती संवेदनशील आहेत, हे दिसून आले. एकीकडे कृषिमंत्री म्हणतात, आम्ही शेतकऱ्यांच्या व्यथा जाणतो आणि आम्ही निर्णय घेण्याच्या तयारीमध्ये आहोत. मात्र दुसरीकडे अधिकारी मोबाईलवर व्यस्त असल्याचे पहायला मिळत आहे. यावरून आता संताप व्यक्त केला जात आहे.