VBA On Ashok Kharat : अशोक खरातच्या जीवाला धोका! कोठडीतच..., 'वंचित'ने व्यक्त केली वेगळीच भीती

Ashok Kharat News : अशोक खरात प्रकरणाकडे सर्वांचे लक्ष लागले आहे. एसआयटीकडून या प्रकरणाची तपास सुरू असून खरातच्या ऑफीस बाॅयमुळे हे प्रकरण समोर आले. या प्रकरणात प्रकाश आंबेडकरांच्या वंचित बहुजन आघाडीने वेगळीच भीती व्यक्त केली आहे.

'वंचित'ने केलेल्या ट्विटमध्ये म्हटले आहे की, आतापर्यंत समोर आलेली माहिती ही “हिमनगाचे टोक” असून, या प्रकरणात अनेक मोठ्या व्यक्तींचा सहभाग असण्याची शक्यता आहे. काही मंत्री, त्यांचे कुटुंबीय, प्रशासनातील वरिष्ठ अधिकारी आणि इतर प्रभावशाली व्यक्तींचे संभाषण रेकॉर्ड झाले आहे.

अशोक खरात हा केवळ आरोपी नसून या संपूर्ण प्रकरणातील महत्त्वाचा साक्षीदार देखील आहे. त्यामुळे त्याच्याकडून महत्त्वाची नावे समोर येऊ नयेत यासाठी त्याला कोठडीतच जीविताला धोका निर्माण होऊ शकतो, अशी भीती 'वंचित'ने व्यक्त केली आहे.

या पार्श्वभूमीवर अशोक खरात याला तात्काळ उच्च सुरक्षा कोठडीत ठेवण्यात यावे, अशी ठाम मागणी वंचित बहुजन आघाडीने केली आहे.

100 पेक्षा अधिक तक्रारी

एसआयटीच्या हेल्पलाईन नंबरवर अशोक खरात विरोधात 100 पेक्षा अधिक तक्रारी आल्या आहेत. यातील 70 टक्के तक्रारी या महिलांच्या आहेत. हेल्पलाईनवर फोन करून तक्रारी करण्यात आल्या असल्या तरी प्रत्यक्ष लेखी तक्रार देण्यात तक्रार उत्सुक नसल्याचे दिसत आहे. त्यामुळे एसआयटीकडून तक्रारांना विश्वासात घेतले जात असल्याची माहिती आहे.