Santosh Deshmukh murder case : संतोष देशमुख हत्या प्रकरणात मोठी अपडेट; फरार आरोपींना मदत करणाऱ्या तिघांना एसआयटीनं उचललं

Beed news : मस्साजोगचे सरपंच संतोष देशमुख यांच्या हत्या प्रकरणात मोठी अपडेट समोर येत आहे. या हत्या प्रकरणाचा तपास सीआयडीकडून सुरु आहे. या प्रकरणी दोन दिवसापूर्वी एसआयटी नेमल्यानंतर तपासाला वेग आला आहे. या प्रकरणातील फरार असलेल्या तीन आरोपींना आयपीएस बसवराज तेली यांच्या नेतृत्वातील एसआयटीने ताब्यात घेतले आहे. ताब्यात घेतलेल्या तिघांनी या प्रकरणातील आरोपी सुदर्शन घुले, कृष्णा आंधळे याच्यासह सुधीर सांगळेला फरार होण्यात मदत केल्याचा संशय आहे.

धारूरच्या कासारीतून डॉ. संभाजी वायबसे यांच्यासह दोघांना चौकशीसाठी ताब्यात घेण्यात आले आहे. या तीनही संशयित आरोपींची दीड तासांपासून कसून चौकशी सुरू आहे. या चौकशीदरम्यान अनेक खुलासे होण्याची मोठी शक्यता आहे, अशी माहिती सूत्रांनी दिली आहे.

संतोष देशमुख हत्या प्रकरणाचा तपास सीआयडीकडून सुरु आहे. सीआयडीकडून (CID) युद्ध पातळीवर तपास सुरु आहे. विशेष म्हणजे या प्रकरणात सीआयडीने 100 पेक्षाही जास्त जणांचा जबाब नोंदवला आहे. तसेच या प्रकरणात मंत्री धनंजय मुंडे यांचे निकटवर्तीय वाल्मिक कराड यालाही अटक केली. वाल्मिक कराड याच्यावर गंभीर आरोप आहेत. या प्रकरणात सीआयडीने आरोपींच्या फोनची कॉल हिस्ट्री, सीडीआर तपासला आहे.

सीआयडीला आरोपींच्या स्कॉर्पिओ गाडीतून मोबाईलदेखील सापडले आहेत. त्या मोबाईलमधून व्हिडीओ देखील प्राप्त झाल्याची चर्चा आहे. पण असं असलं तरीही तपासात आतापर्यंत काय-काय पुरावे मिळाले, याबाबत पूर्ण तपास होत नाही तोपर्यंत खुलासा होणार नाही. या प्रकरणात सीआयडीचा युद्ध पातळीवर तपास सुरु आहे.

दरम्यान, या प्रकरणी सरपंच संतोष देशमुख यांच्या निर्घृण हत्येनंतर राज्यात संताप व्यक्त केला जात आहे. दरम्यान, या प्रकरणाचा तपास सीआयडीकडून सुरु असताना बुधवारी या प्रकरणी राज्य सरकरकडून एसआयटीही स्थापन करण्यात आली. सीआयडी अधिकाऱ्यांची संतोष देशमुख यांचे बंधू धनंजय यांनी भेट घेतली. सीआयडीकडून सध्या युद्धपातळीवर संतोष देशमुख हत्या प्रकरणाचा तपास सुरू असून आतापर्यंत दीडशेहून अधिक जणांची या प्रकरणात चौकशी करण्यात आली आहे.

दरम्यान, संतोष देशमुख यांची 9 डिसेंबर रोजी हत्या करण्यात आली होती. या हत्येप्रकरणी केज पोलिस ठाण्यात सुदर्शन चंद्रभान घुले, कृष्णा शामराव आंधळे, सुधीर ज्ञानोबा सांगळे, महेश सखाराम केदार, जयराम माणिक चाटे, प्रतिक भीमराव घुले, विष्णू महादेव चाटे या सात जणांविरुद्ध गुन्हा दाखल करण्यात आला आहे.

या आरोपींपैकी पोलिसांनी महेश केदार, जयराम चाटे, प्रतिक घुले, विष्णू चाटे या चौघांना आधीच अटक केली आहे. तर मुख्य आरोपी सुदर्शन घुले, कृष्णा आंधळे, सुधीर सांगळे हे तिघे फरार होते. त्यांना पकडून देणाऱ्यांना पोलिसांनी बक्षीस जाहीर केलं होतं. त्यानुसार आता घुले आणि सांगळेला पोलिसांनी अटक केली असली तरी कृष्णा आंधळे अद्याप फरार असल्याची माहिती आहे.