Ajit Pawar Decision : बीडच्या पालकमंत्रिपदाचा सस्पेन्स संपणार; मुंबईत दाखल होताच अजित पवार घेणार निर्णय

Mumbai News : राज्यात नुकत्याच पार पडलेल्या विधानसभा निवडणुकीनंतर महायुतीचे सरकार आले. 5 डिसेंबर रोजी म्हणून देवेंद्र फडणवीस यांनी मुख्यमंत्री पदाची तर एकनाथ शिंदे आणि अजित पवार यांनी उपमुख्यमंत्री म्हणून शपथ घेतली. मंत्रिमंडळ विस्तार देखील झाला त्यानंतर खातेवाटप झाले. मात्र, अजून पालकमंत्र्यांच्या नावांची घोषणा करण्यात आली नाही. पालकमंत्रिपदासाठी महायुतीमध्ये रस्सीखेच सुरू आहे. त्यातच दुसरीकडे बीड जिल्ह्याचे पालकमंत्रीपद कोणाला मिळणार, याची जास्त चर्चा रंगली आहे.

बीड जिल्ह्यातील मस्साजोग येथील सरपंच संतोष देशमुख हत्याप्रकरणामुळे राज्यातील वातावरण चांगलेच तापले आहे. त्यातच या प्रकरणात वाल्मिक कराडला अटक करण्यात आली. त्यामुळे धनंजय मुंडे (Dhananjay Munde) यांच्या मंत्रि‍पदावर टांगती तलवार असताना त्यांनाच पुन्हा बीड जिल्ह्याचे पालकमंत्रीपद मिळण्याची शक्यता फारच कमी आहे. त्यामुळे आता बीड जिल्ह्याचे पालकमंत्रीपद कोणाला मिळणार, याविषयी तर्कवितर्क लढवले जात आहेत.

राज्यातील मंत्रिमंडळाचे खातेवाटप होऊन 15 दिवसाचा कालावधी लोटला आहे. त्यामुळे आता पालकमंत्र्यांची घोषणा लवकरच होण्याची शक्यता आहे. या पार्श्वभूमीवर आता अजित पवार (Ajit Pawar) यांच्याकडून महत्त्वाचा निर्णय घेतला जाण्याची शक्यता आहे. उपमुख्यमंत्री अजित पवार दोन जिल्ह्यांचे पालकमंत्रीपद त्यांच्याकडे घेण्याची शक्यता आहे. अजित पवार पुण्यासह आणखी एका जिल्ह्याचे पालकमंत्री पद घेऊ शकतात. दुसरा जिल्हा बीड असू शकतो, अशी चर्चा राजकीय वर्तुळात रंगली आहे.

महायुतीत पुणे आणि बीड जिल्ह्याचे पालकमंत्रीपद राष्ट्रवादी काँग्रेस पक्षाच्या वाट्याला येऊ शकते. अजित पवार मुंबईत दाखल झाल्यानंतर पालकमंत्री पदाबाबत अंतिम निर्णय होणार आहे. त्यानंतर राष्ट्रवादी काँग्रेसची पालकमंत्री पदाची यादी महायुतीच्या समन्वयकांना देण्यात येणार असल्याचे समजते.

आतापर्यंत बीड जिल्ह्याचे पालकमंत्री पद हे मुंडे घराण्यातील व्यक्तीकडे राहत होता. हे अलिखित समीकरण होते. मात्र, मंत्री धनंजय मुंडे हे मोठ्या संकटात सापडले आहेत. त्यामुळे धनंजय मुंडे यांना पालकमंत्रीपद मिळण्याची शक्यता खूपच कमी आहे. अशा परिस्थितीत बीड जिल्ह्याचा नवा पालकमंत्री कोण असणार, याची उत्सुकता राजकीय वर्तुळाला लागली आहे. दुसरीकडे विरोधकांनी धनंजय मुंडे यांच्याकडे बीडचे पालकमंत्रीपद देऊ नये अशी मागणी लावून धरली आहे. त्यामुळे धनंजय मुंडे यांच्या अडचणीत वाढ झाली आहे.