Maharashtra Congress: लोकसभेसाठी काँग्रेसचं मोठं पाऊल,दिग्गजांचा समावेश असलेल्या 'या' समितीची घोषणा

New Delhi News : येत्या काही दिवसातच लोकसभा निवडणुकीचा कार्यक्रम जाहीर होईल. त्या पार्श्वभूमीवर देशातील सर्वच राजकीय पक्षांकडून निवडणुकीची जोरदार तयारी सुरू करण्यात आली आहे. दरम्यान, काँग्रेसनेही आगामी लोकसभा निवडणुकीसाठी महाराष्ट्रातील निवडणूक समितीची घोषणा केली आहे.

काँग्रेसचे प्रदेशाध्यक्ष नाना पटोले यांच्या अध्यक्षतेखाली ही निवडणूक समिती स्थापन करण्यात आली असून या महाराष्ट्र काँग्रेस समितीच्या प्रस्तावाला काँग्रेसपक्ष श्रेष्ठींकडून मान्यता देण्यात आली आहे.

समितीत 52 नेते आणि पदाधिकाऱ्यांचा समावेश

संघटनेचे सरचिटणीस केसी वेणुगोपाल यांनी जारी केलेल्या पत्रात महाराष्ट्र काँग्रेसचे प्रदेशाध्यक्ष नाना पटोले यांच्या अध्यक्षतेखाली एकूण 52 नेते आणि पदाधिकाऱ्यांची समिती गठीत करण्यात आली आहे. (Loksabha Election 2024)

या समितीमध्ये माजी केंद्रीय गृहमंत्री सुशीलकुमार शिंदे (Sushilkumar Shinde), माजी मुख्यमंत्री पृथ्वीराज चव्हाण, अशोक चव्हाण, माजी प्रदेशाध्यक्ष बाळासाहेब थोरात, सतेज पाटील, मुकूल वासनिक, विरोधीपक्ष नेते विजय वडेट्टीवार, सुनिल केदार यांच्यासह रजनी पाटील, यशोमती ठाकूर, प्रणिती शिंदे , वर्षा गायकवाड अशा एकूण 52 नेते आणि पदाधिकाऱ्यांचा समावेश करण्यात आला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सावंत, लोंढेचा समावेश नाही...

दरम्यान, महाराष्ट्र प्रदेश काँग्रेसच्या निवडणूक समितीमध्ये काँग्रेसचे अभ्यासू नेते सचिन सावंत यांचा समावेश केला नसल्याचे दिसून आले आहे. सचिन सावंत हे नेहमीच पक्षाची अभ्यासपूर्ण भूमिका मांडताना दिसून येतात. मात्र, सचिन सावतांना महाराष्ट्र प्रदेश काँग्रेसकडून डावलले जात असल्याचा प्रकार दिसून येत आहे.

याशिवाय पटोलेंचे समर्थक मानले जाणारे काँग्रेसचे (Congress) मुख्य प्रवक्ते अतुल लोंढे यांनाही या समितीमध्ये समाविष्ट केले नसल्याचे दिसून आले आहे. पटोले यांच्या अध्यक्षतेखालील या समितीवर आगामी लोकसभा निवडणुकीची जबाबदारी असणार आहे.

(Edited By Deepak Kulkarni)