BJP Politics: भाजपचे ऑपरेशन मनधरणी: निष्ठावंतांची नाराजी दूर कोण करणार? जबाबदारी दिली वाटून

BJP Politics: महापालिका निवडणुकांमध्ये निष्ठावंतांना डावलून दुसऱ्या पक्षातून आलेल्या आणि पक्षाच्या आमदार-खासदार आणि मंत्र्यांच्या नातेवाईकांना उमेदवाऱ्या दिल्यानं भाजपच्या जुन्या कार्यकर्त्यांमध्ये मोठी नाराजी पाहायला मिळाली. यामुळं काल दिवसभर ठिकठिकाणी अशा नाराजांचा आक्रोश सुरु होता.

मुंबई, पुणे, नाशिक, छत्रपती संभाजीनगर, अकोला, चंद्रपूर अशा जवळपास सर्वच महापालिकांमध्ये भाजपने उमेदवारी नाकारलेले नाराज आहेत. यातूनच काल दिवसभर उद्रेक सुरु होता. अनेकांनी याविरोधात पक्षांना जाब विचारले तसंच अनेकांनी आक्रोशही व्यक्त केला. तर अनेकांनी पक्षाला धुडकावून लावत बंडखोरी करत थेट अपक्ष म्हणून अर्ज भरले. पण आता अर्ज भरण्याची प्रक्रिया पूर्ण झाल्यानंतर या बंडखोर उमेदवारांमुळं पक्षाच्या अधिकृत उमेदवारांना शह बसण्याची शक्यता निर्माण झाल्यानं आता या बंडखोरांनी अर्ज मागे घ्यावेत यासाठी भाजपकडून ऑपरेशन मनधरणी राबवण्यात येणार आहे.

दरम्यान, भाजपनं आता या निष्ठावंतांची नाराजी शांत करण्याची जबाबदारी संबंधित स्थानिक आमदार, खासदार, माजी आमदार, खासदार यांच्यावर सोपवली आहे. पण आता हे स्थानिक नेते आपलं कौशल्य वापरुन आणि वरिष्ठ नेत्यांशी चर्चा करुन या बंडखोर कार्यकर्त्यांना कोण कोणती आश्वासनं देऊन त्यांना शांत करतात हे पाहावं लागणार आहे.