Ajit Pawar News : 1 एप्रिलला नागरिकांना मोठा 'शाॅक' बसणार; अर्थसंकल्पानंतर अजित पवारांचा खळबळजनक दावा

Maharashtra Assembly Budget Session : राज्याचे उपमुख्यमंत्री व अर्थमंत्री देवेंद्र फडणवीस यांनी विधानसभेत अर्थसंकल्प सादर केला. या अर्थसंकल्पावर विरोधी पक्षनेते अजित पवार, विधान परिषदेचे विरोधी पक्षनेते अंबादास दानवे तसेच उध्दव ठाकरे यांनी सडकून टीका केली आहे.मात्र,याचदरम्यान अजित पवारांनी शिंदे फडणवीस सरकारच्या अर्थसंकल्पानंतर मोठं विधान केलं आहे. यामुळे एकच खळबळ उडाली आहे.

अजित पवार यांनी माध्यमांशी संवाद साधला. यावेळी ते बोलत होते. पवार म्हणाले, अर्थमंत्र्यांनी सादर केलेला अर्थसंकल्प आपण पाहिला. खरंतर हा अर्थसंकल्प म्हणजे एक प्रकराचा चुनावी जुमला आहे. यात आपल्याला दूरदृष्टीचा अभाव जाणवेल. तसेच वास्तवाचं भान नसलेला हा अर्थसंकल्प आहे. या राज्यात अलिकडच्या काळात राष्ट्रवादी काँग्रेसचे नेते जयंत पाटील यांनी ९ वेळा आणि मी स्वतः ७ वेळा अर्थसंकल्प सादर केला आहे.

माझ्या मते स्वप्नांचे इमले, शब्दांचे फुलोरे आणि घोषणांचा सुकाळ असलेला हा अर्थसंकल्प आहे अशी टीका पवार यांनी यावेळी केली. तसेच मराठीत एक म्हण आहे की, 'लबाडाच्या घरचं आवताण जेवल्याशिवाय खरं मानायचं नाही'असं या अर्थसंकल्पाचं वर्णन करता येईल असंही अजित पवार (Ajit Pawar) म्हणाले.

याचवेळी पवार म्हणाले, मला अशी माहिती आहे की, 25 तारखेला अधिवेशन संपलं की, 1 एप्रिलला नागरिकांना मोठा झटका बसणार आहे. तेव्हा 1 एप्रिलला एप्रिल फुल नाही, तर झटकाच बसणार आहे. 30 ते 35 टक्के विजेची दरवाढ होणार आहे. फक्त ते मी आता सांगत नाही. अर्थसंकल्प झाल्यावर सांगेन, असं ते म्हणाले. त्यामुळं ऐन उन्हाळ्यात नागरिकांना वीज दरवाढीचा झटका बसण्याची शक्यता आहे असंही पवार यावेळी म्हणाले.

राज्य कर्जाच्या खाईत असताना अर्थमंत्री देवेंद्र फडणवीस यांनी वास्तवाचं भान नसलेला अर्थसंकल्प मांडला. अख्ख्या अर्थसंकल्पात शब्दांचे इमले बांधले आणि जनतेला स्वप्नात फिरवून आणलं. खरं तर सर्वोच्च न्यायालयाचा १४ मार्चचा निकाल विरोधात जातोय की काय, अशी शंका आल्यानेच निवडणुका डोळ्यासमोर ठेऊन आजच्या अर्थसंकल्पात घोषणांचा पाऊस पाडला गेला आहे असंही पवार यावेळी म्हणाले.