Dhananjay Munde in Action : बॅकफूटला गेलेले धनंजय मुंडे पुन्हा अ‍ॅक्टिव्ह,अजितदादांसोबत दिसले, शिवराजला भेटले!

Dhananjay Munde Politics: संतोष देशमुख हत्या प्रकरणानंतर विरोधकांच्या निशाण्यावर धनंजय मुंडे होते. त्यांच्या मंत्रि‍पदाच्या राजीनाम्याची मागणी देखील होत होती. अखेर प्रकृतीच्या कारणास्तव राजीनाम देत असल्याचे सांगत धनंजय मुंडे मंत्रिमंडळातून बाहेर पडले होते. त्यानंतर त्यांच्या डोळ्यांवर शस्त्रक्रिया झाल्याने ती काही दिवस आराम करत होते. अजित पवार हे बीडच्या दौऱ्याावर आल्यानंतर त्यांनी प्रकृतीचे कारण देत दौऱ्यात सहभाग घेतला नाही. मात्र, आता बॅकफूटवर गेलेले धनंजय मुंडे पुन्हा अ‍ॅक्टिव्ह झाल्याचे चित्र आहे.

उपमुख्यमंत्री झाल्यापासून तसेच बीडचे पालकमंत्रिपद स्वीकारल्यापासून अजित पवार हे आज (सोमवारी) पहिल्यांदाच परळीच्या दौऱ्यावर आले आहेत. या दौऱ्यात धनंजय मुंडे हे अजित पवारांच्यासोबत दिसले. तसेच वैद्यनाथ तीर्थक्षेत्र विकास कामांचा आढावा अजित पवारांनी घेतला तेव्हा मुंडे त्यांच्यासोबत होते.

अजित पवार यांच्या दौऱ्याच्या आधी धनंजय मुंडे यांनी परळी मतदारसंघात सध्या सुरू असलेल्या राष्ट्रवादी काँग्रेस पक्षाच्या सदस्य नोंदणी अभियानाच्या अनुषंगाने राष्ट्रवादी काँग्रेस पक्षाचे पदाधिकारी, विविध आघाडी व फ्रंटल सेलचे सहकाऱ्यांची चर्चा केली. तसेच पक्ष संघटना अजून मजबूत करण्यासाठी सूचना केल्या.

शिवराजची घेतली भेट

परळी तालुक्यातील लिंबोटी गावातील शिवराज दिवटे या तरुणाला 20 जणांनी मिळून बेदम मारहण केली होती. मारहाणीचा व्हिडिओ व्हायरल झाला होता. या मारहाणीला जातीयरंग देण्याचे प्रयत्न होत असल्याचे आरोप करण्यात येत आहे.

त्या पार्श्वभूमीवर धनंजय मुंडे यांनी शिवराज दिवटे याची रविवारी स्वामी रामानंद तीर्थ ग्रामीण रुग्णालय अंबाजोगाई येथे भेट घेऊन त्याच्या तब्येतीची विचारपूस केली. मारहाण केलेल्या सर्व आरोपींवर कसलीही गय न करता कठोर कारवाई केली जाईल, असे आश्वासन दिले.