Eknath Khadse : एकनाथ खडसेंची घरवापसी नाहीच! स्वतःच सगळं स्पष्ट सांगितलं, 'शरद पवारसाहेबांसोबत...'

Eknath Khadse News : एकनाथ खडसे यांची भाजपचे सरचिटणीस विनोद तावडे यांनी नुकतीच भेट घेतली होती.त्यामुळे खडसे यांची घरवापसी होणार असल्याच्या चर्चा सुरू झाल्या होत्या. खडसेंच्या भाजप प्रवेशाला काही स्थानिक नेत्यांकडून विरोध देखील करण्यात येत होता. अखेर या सगळ्याबाबत खडसेंनी आपली भूमिका मांडत ते भाजपमध्ये जाणार नसल्याचे स्पष्ट केले.

खडसे म्हणाले, त्यांना भाजपमध्ये जाण्यास कोणताही रस नाही. मी शरद पवारसाहेबांच्या बरोबर आहे आणि पवारसाहेच्या बरोबरच राहिल. माझे काही कार्यकर्ते भाजपमध्ये जाण्यास इच्छुक आहेत ते ते म्हणत आहेत आपण भाजपमध्ये जाऊ हे मी अमान्य करणार नाही. मात्र मी पवारसाहेबांच्या बरोबर आहे.

पुढे बोलताना ते म्हणाले, गिरीश महाजन मुख्यमंत्रीपदाच्या रेसमधला माणूस आहे. त्या संदर्भात त्याच्या मतदारसंघातही पोस्टर लागले होते. त्याच्याशी मी संघर्ष करतोय. ते दिवस विसरले की त्यांना राजकारणामध्ये तिकीट मिळत नव्हते. मी आग्रह धरला होता की गिरीश महाजन चांगला कार्यकर्ता आहे. त्याला संधी मिळाली पाहिजे.

अमित शाहांचा फोन अन्...

खडसे यांनी गौप्यस्फोट करताना सांगितले की, मला अमित शाह यांनी लोकसभा निवडणुकीच्या आधी दिल्लीला बोलावले होते. मी दिल्लीला गेले त्यांची भेट घेतली. त्यांनी सांगितले की, लोकसभा आमचे काम करा. तुम्हाला लगेच भाजपमध्ये प्रवेश देता येणार नाही. जर भाजपमध्ये प्रवेश दिला तर स्थानिक कार्यकर्ते काम करणार नाहीत म्हणून सांगतायेत, सीट पाडणार असल्याचे ब्लॅकमेल करत आहेत. निवडणूक होऊद्या मग आपण निर्णय घेऊ. मग ब्लॅकमेल कोण करत होते?