Eknath Shinde Video : विधानसभेतील विजयानंतरही एकनाथ शिंदे स्वस्थ बसेनात, राज्यभर दौरा करणार?

Eknath Shinde News : विधानसभा निवडणुकीत महायुतीला बंपर यश मिळाले. महाविकास आघाडीतील एकाही पक्षाला विरोधीपक्ष नेतेपदावर दावा सांगता येत नाही, येवढी त्यांची घसरण झाली. विरोधकच शिल्लक राहिले नसल्याने महायुतीमधील पक्ष आरामाच्या मुडमध्ये असतील, अशी शक्यता होती. मात्र, निकालाच्या अवघ्या दीड महिन्यात शिवसेनेचे मुख्य नेते, उपमुख्यमंत्री एकनाथ शिंदे "अॅक्शन मोड'वर आहेत.

एकनाथ शिंदे कोल्हापूरपासून 'आभार यात्रा' सुरू करणार आहेत. अंबाबाईचे दर्शन घेऊन ते यात्रेला सुरुवात करतील. ही यात्रा पुढील दीड महिना चालणार आहे. या यात्रेच्या निमित्ताने शिवसेनेकडून पुन्हा एकदा महाराष्ट्र पिंजून काढण्यात येणार आहे.

एकनाथ शिंदे यांचे प्रमुख स्पर्धक उद्धव ठाकरे यांची विधानसभा निवडणुकीत मोठी पिछेहाट झाली आहे. त्यामुळे या यात्रेनिमित्त शिंदे प्रत्येक जिल्ह्यातील आपले संघटन मजबूत करतील. उद्धव ठाकरेंसोबत असलेले शिवसैनिक देखील आपल्याकडे आणण्याचे प्रयत्न केले जाण्याची शक्यता आहे.

निवडणुकीची तयारी

आगामी स्थानिक स्वराज्य संस्था आणि महानगरपालिका निवडणुका डोळ्यासमोर ठेवून शिवसेनेची ताकद वाढवण्याचा शिंदे यांचा प्रयत्न आहेत. त्यासाठी आभार यात्रेमुळे शिवसैनिक पुन्हा लोकांमध्ये जातील आणि त्याचा फायदा शिवसेनेला निवडणुकीमध्ये होण्याची शक्यता आहे.

महापालिका निवडणूक स्वबळावर?

आगामी स्थानिक स्वराज संस्थांच्या निवडणुका महायुती एकत्र लढणार की स्वबळावर हे स्पष्ट झाले नाही. भाजपचे कार्याध्यक्ष रवींद्र चव्हाण यांनी आगामी निवडणुका महायुतीत लढायची की नाही याचा निर्णय वरिष्ठ घेतील असेल म्हटले आहे. तर, एकनाथ शिंदे यांच्या शिवेसेनेमध्ये पुढील स्थानिक स्वराज संस्थांच्या निवडणुका महायुतीमध्ये एकत्र लढायची चर्चा आहे.