Shiv Sena News : एकनाथ शिंदेंचा भाजपला धक्का; यवतमाळच्या तेजस ठाकरे यांची शिवसेनेत एंट्री

ShivSena news : काही दिवसांपासून उपमुख्यमंत्री एकनाथ शिंदे यांच्या शिवसेनेत जोरदार इनकमिंग सुरू आहे. महाविकास आघाडीतील शिवसेना उद्धव बाळासाहेब ठाकरे, काँग्रेस, राष्ट्रवादी काँग्रेस शरदचंद्र पवार यांच्या पक्षातून मोठ्या प्रमाणात प्रवेश होत आहेत. त्यातच एकनाथ शिंदे यांनी भाजपला धक्का दिला आहे.

यवतमाळ जिल्ह्यातील भाजपचे (BJP) कार्यकर्ते तेजस गोविंद ठाकरे यांनी एकनाथ शिंदे यांच्या उपस्थित शिवसेनेत प्रवेश केला आहे. यवतमाळ जिल्ह्यातील महागांव आणि नेर भागातील कार्यकर्त्यांनी एकनाथ शिंदे यांच्या शिवसेनेत प्रवेश केला आहे. मुंबईत शिंदे यांच्या उपस्थित मोठा पक्षप्रवेशाचा कार्यक्रम पार पडला. यावेळी मंत्री संजय राठोड देखील उपस्थित होते.

ठाकरे यांच्या या प्रवेशामुळे यवतमाळमध्ये भाजपला धक्का बसल्याचे मानले जात आहे, तसेच शिवसेनेच्या (Shiv sena) शिंदे गटाला स्थानिक स्वराज्य संस्थांच्या निवडणुकांसाठी बळकटी यानिमित्ताने लाभली आहे. यवतमाळहुन आलेले हे सर्व जण आधीपासूनच मुंबईत येऊन थांबले होते. तर एकनाथ शिंदे दिल्लीवरून गुरुवारी रात्री साडेअकरा वाजता आले. त्यानंतर हा प्रवेश सोहळा पार पडला. यावेळी शिंदे यांनी यवतमाळ येथील पदाधिकाऱ्यांचे स्वागत केले.

या प्रवेशावेळी बोलताना शिंदे म्हणाले, 'विधानसभा निवडणुकीत महायुतीला 232 जागांचे बहुमत मिळाले. लाडक्या बहिणींनी ही भरभरुन मदत केली. ही नांदी ठरली आहे. महायुतीवर लोक विश्वास दाखवण्याचे काम करत आहेत. त्यामुळे या पुढील काळात विरोधकांमध्ये कोणी शिल्लक राहील किंवा नाही याबद्दल मला शंका आहे. '

दरम्यान, तेजस ठाकरे यांचा एकनाथ शिंदे यांच्या नेतृत्वाखालील शिवसेनेत प्रवेश ही निश्चितच राजकीय दृष्टिकोनातून महत्त्वाची घटना आहे. ठाकरे नावाशी असलेली जोड आणि त्यांचा शिंदे गटात प्रवेश यामुळे राजकीय वर्तुळात चर्चा रंगणे साहजिकच आहे. ठाकरे यांच्या या प्रवेशामुळे राजकीय वर्तुळात चर्चला उधाण आले आहे.