Eknath Shinde Politics : मोठी बातमी! ठाकरे बंधूंच्या ऐक्याच्या चर्चा सुरू असतानाचा एकनाथ शिंदेंनी गुपचूप दिल्ली गाठली!

Eknath Shinde News : राज-ठाकरे उद्धव ठाकरे एकत्र येण्याच्या चर्चेने महाराष्ट्रातील राजकारणाला वेगळीच दिशा मिळण्याची शक्यता आहे. ठाकरे बंधू एकत्र आल्याने त्याचा थेट फटका उपमुख्यमंत्री एकनाथ शिंदे यांच्या शिवसेनेला बसण्याची शक्यता आहे. मुंबई महापालिकेत तर शिंदेंची पिछेहाट होईलच पण महाराष्ट्राच्या राजकारणसुद्धा त्यांच्या पुढे मोठे आव्हान उभे राहणार आहे. या सगळ्या चर्चांमध्ये पावसाळी अधिवेशन सुरू असताना एकनाथ शिंदे यांनी गुपचूप दिल्लीचा दौरा केल्याचे समोर आले आहे. या विषयी 'साम टिव्ही'ने सुत्रांच्या हवाल्याने वृत्त दिले आहे.

बुधवारी एकनाथ शिंदे हे आपले नियोजित कार्यक्रम सोडून थेट दिल्लीला गेले. तेथे त्यांनी भाजपच्या बड्या नेत्यांची भेट घेण्याचा प्रयत्न केला. दिल्ली दौऱ्याच्या त्यांच्या महाराष्ट्रातील नियोजित कार्यक्रमांना मंत्री उदय सामंत यांनी हजेरी लावली. विशेष म्हणजे आज (गुरुवारी) मुख्यमंत्री देवेंद्र फडणवीस यांच्या हस्ते मुंबईतील पुलाला सिंदूर पूल नाव देत त्याचे उद्घाटन करण्यात आले. या नियोजित कार्यक्रमाला शिंदे गैरहजर राहिले आहेत. त्यामुळे एकनाथ शिंदे अजुनही दिल्लीतच असल्याचा अंदाज वर्तवला जात आहे.

ठाकरे बंधू एकत्र येत असताना त्यांच्या विरोधात दिल्लीतून आपल्याला ताकद मिळावी. अमित शाह यांनी मुंबई महापालिका निवडणुकीत लक्ष घालून शिवसेनेला अधिक जागा सोडाव्यात तसेच रणनीती आखताना शिवसेनेचा प्रामुख्याने विचार करावा यासाठी एकनाथ शिंदे दिल्लीत गेले असल्याचे अंदाज वर्तवले जात आहे.

निधीसाठी दिल्लीत?

मुंबईच्या, महाराष्ट्राच्या विकासाठी निधी आणणं आमची जबाबदारी आहे. त्यामुळे ज एकनाथ शिंदेसाहेब दिल्लीला गेले असतील तर त्याच भावनेने गेले असतील, असे मंत्री उदय सामंत यांनी सांगितले तर, महाराष्ट्रात काय चालले आहे? सरकारमध्ये जे गँगवाॅर चालले आहेत. त्याची कहाणी सांगण्यासाठी दिल्लीत सांगायले गेले असतील, असा टोला काँग्रेसचे नेते नाना पटोले यांनी एकनाथ शिंदे यांना लगावला आहे.