Mahayuti Politics : कोकाटेंना दणका बसताच शिंदेंचा मंत्री अलर्ट; योगेश कदमांकडून 'सावली बार'बाबत मोठा निर्णय!

Yogesh Kadam News : वादग्रस्त वक्तव्य आणि विधीमंडळात मोबाईलवर पत्ते खेळणाऱ्या माणिकराव कोकाटेंकडून कृषिमंत्रीपद काढून घेण्यात आले आहे. त्यांच्याकडे क्रिडा खात्याची जबाबदारी देण्यात आले आहे. त्यामुळे एकनाथ शिंदेंच्या वादग्रस्त मंत्र्यांवर काय कारवाई होणार याची चर्चा होती. त्यातच गृहराज्यमंत्री योगेश कदम यांच्या आईच्या नावावर असलेल्या सावली बारवर मोठी कारवाई करण्यात आली आहे.

सावली बारचे लायसन्स योगेश कदम यांच्याकडून सरेंडर करण्यात आले आहे. लायसन्स सरेंडर केल्यानंतर ते रद्द करण्याचा निर्णय घेण्यातआला. योगेश कदम यांच्या आईंच्या नावानं ॲार्केस्ट्रा बारचे लायसन्स असल्यामुळे त्यांचे गृहराज्यमंत्रीपद अडचणीत आले होते. मात्र, केवळ बारचे लायसन्स रद्द केल्याने त्यांचे मंत्रिपद वाचल्याची चर्चा आहे.

गृहराज्यमंत्र्याच्या आईच्या नावावर बारचे लायसन्स असल्याचा प्रश्न आमदार अनिल परब यांनी विधीमंडळात उपस्थित केला होता. यासंदर्भात त्यांनी कागदपत्रे देखील दाखवली होती. मुख्यमंत्र्यांनी योगेश कदम यांचा राजीनामा घ्यावा म्हणून परब आक्रमक झाले होते.

योगेश कदम यांचे वडील माजी मंत्री रामदास कदम यांनी या बारविषयी स्पष्टीकरण देताना बारचे लायसन्स आपल्या पत्नीच्या नावे असले तरी तो बार आपण चालवत नसल्याचे स्पष्ट केले तसेच हा बार शेट्टी नावाच्या व्यक्तीला भाड्याने दिल्याचे देखील त्यांनी सांगितले होते. दरम्यान, या बारवर आरोप केल्यापासून तो बंद ठेवण्यात आला होता. आता जो व्यक्ती बार भाड्याने चालवत होता त्याच्यासोबतचा करार देखील रद्द करण्यात आला आहे.

एकनाथ शिंदेंकडून कदमांना पाठींबा

सावली बारवरून योगेश कदम यांच्या मंत्रि‍पदाच्या राजीनाम्यासाठी विरोधक आक्रमक होते. मात्र, कोकणात गुहागर मतदारसंघात झालेल्या कार्यक्रमात उपमुख्यमंत्री एकनाथ शिंदे यांनी योगेश मी तुझ्या पाठीशी आहे, असे म्हणत योगेश कदम यांना पाठींबा दिला होता. मात्र, आता डॅमेज कंट्रोलसाठी सावली ॲार्केस्ट्रा बारचा परवाना सरेंडर करण्यात आला असल्याची माहिती आहे.