Shivsena Politics : शिंदेंच्या बालेकिल्ल्यात बंडखोरीची ठिणगी! म्हस्केंच्या मुलालाच गोगावलेंच्या निकटवर्तीयाचा विरोध अन् जोरदार घोषणाबाजी

Thane Municipal elections : घराणेशाहीविरोधात शिवसेनेच्या माजी महापौर मिनाक्षी शिंदे यांनी पेटवलेली ठिणगी आता थेट खासदार नरेश म्हस्के यांच्या दारापर्यंत पोहोचली आहे. ठाणे महापालिका निवडणुकांच्या पार्श्वभूमीवर खासदार होण्यापूर्वी नगरसेवक म्हणून ज्या प्रभागाचे प्रतिनिधित्व म्हस्के करीत होते, त्या प्रभागातून त्यांचे पुत्र आशुतोष म्हस्के यांना उमेदवारी देण्याच्या हालचाली सुरू झाल्या आहेत; मात्र याला शिवसेनेतूनच उघड विरोध होऊ लागला आहे.

नरेश म्हस्के हे शिवसेना एकसंध असताना कोपरीतील आनंदनगर भागातून सातत्याने नगरसेवक म्हणून निवडून येत होते. आता या प्रभागात उमेदवारीसाठी अनेक इच्छुक आहेत. याच पार्श्वभूमीवर खासदारांचे पुत्र आशुतोष म्हस्के यांची तयारी सुरू असल्याचे संकेत मिळताच वर्षानुवर्षे काम करणाऱ्या कार्यकर्त्यांमध्ये नाराजी पसरल्याचे दिसते.

शिवसेनेचे मंत्री भरत गोगावले यांचे खंदे समर्थक आणि कार्यकर्ते प्रमोद गोगावले यांचाही नाराजांमध्ये समावेश आहे. त्यांच्या समर्थकांनी गोगावले यांना यंदा उमेदवारी मिळावी यासाठी थेट रस्त्यावर उतरून मागणी केली आहे.

आपण गेली 25 वर्षे प्रभागात काम करीत असल्याचा दावा प्रमोद गोगावलेंनी केला आहे. गेल्या दोन वेळा वरिष्ठांसाठी आपण इच्छुक असूनही माघार घेतली. मग आता तरी संधी देण्यात यावी, अशी इच्छा व्यक्त करण्यात गैर काय आहे, असे ते म्हणाले.

आपण पक्षाकडे इच्छुक म्हणून अर्ज दाखल केला आहे. आता पक्षश्रेष्ठी निर्णय घेतील, पण माझ्या कामाची दखल घेतली जावी, अशी भूमिका त्यांनी मांडली आहे. शिवसेना आणि भाजपमध्ये जागावाटपाची रस्सीखेच सुरूच आहे. त्यातच अनेक माजी नगरसेवक आपल्या मुलामुलींना राजकीय वारसदार म्हणून पुढे आणण्याच्या तयारीत असल्याने कार्यकर्त्यांमध्ये असंतोष वाढत आहे.

FAQs :

1. ठाणे महापालिका निवडणुकीत वाद का निर्माण झाला?
उमेदवारी निवडीवरून शिंदे गटात अंतर्गत मतभेद उफाळून आले आहेत.

2. आशुतोष म्हस्के कोण आहेत?
ते खासदार नरेश म्हस्के यांचे पुत्र असून प्रभागातून निवडणूक लढवण्यास इच्छुक आहेत.

3. प्रमोद गोगावले यांना समर्थन का मिळत आहे?
ते गेल्या 35 वर्षांपासून प्रभागात सक्रियपणे पक्षासाठी काम करत आहेत.

4. कार्यकर्त्यांचा मुख्य आक्षेप काय आहे?
घराणेशाहीपेक्षा निष्ठावंत कार्यकर्त्यांना संधी द्यावी, अशी त्यांची मागणी आहे.

5. या वादाचा निवडणुकीवर काय परिणाम होऊ शकतो?
शिंदे गटातील मतभेदांचा थेट फटका निवडणूक रणनीतीवर बसू शकतो.