Jamkhed Nagar Parishad Result : राम शिंदेंनी गुलाल उधाळला,पराभवाने रोहित पवार निराश; म्हणाले, 'कसा विश्वास ठेवायचा...'

Jamkhed Nagar Parishad : जामखेड नगरपरिषदेच्या निवडणुकीत राम शिंदेंनी रोहित पवारांना पराभवाची धूळ चारली. 15 जागांसह नगराध्यक्षपदी भाजपचा उमेदवार विजयी झाला. नगपरिषदेची निवडणूक असतील तरी या निवडणुकीत शिंदे-पवारांची प्रतिष्ठापणाला लागली होती.

या पराभवानंतर रोहित पवार यांनी सोशल मीडियावर पोस्ट करत आपल्या भावना व्यक्त केल्या, ते म्हणाले, 'जनतेने दोनदा मतांचं दान भरभरुन पदरात टाकलं, त्यांच्या मी कायम ऋणात राहिल, पण कार्यकर्त्यांनी परिश्रम घेतले आणि उमेदवारांनीही पूर्ण ताकदीने निवडणूक लढवली तरी आज लागलेला हा निकाल अत्यंत निराशाजनक आणि काम करणाऱ्याला नाऊमेद करणारा आहे.'

'जनतेवर आक्षेप नाही पण सगळीकडे पैसाच चालत असेल तर बचत गट चालक, शेतकरी, दुकानदार आणि इतर अशा राजकीय दृष्टीकोनातून दुर्लक्षित आणि सामान्य कुटुंबातील उमेदवारांना आम्ही सत्तेच्या प्रवाहात आणण्याचा प्रयत्न करत होतो, त्यांना न्याय कधी मिळणार, हा प्रश्नच आहे.', असे देखील ते म्हणाले.

'आज तत्व आणि विकासावर चालणारं स्वच्छ राजकारण कमी आणि पैशांनी गढूळ झालेलंच अधिक दिसतं. म्हणूनच आमच्या विरोधात निवडून आलेल्या काही लोकांचे कारनामे आणि धंदे बघितले तर चारचौघात त्या धंद्यांचं नाव घेण्याचीही लाज वाटते… मग अशा परिस्थितीत डोक्यात विचारांचं काहूर उठल्याशिवाय राहत नाही!', असेही ते म्हणाले.

काँग्रेस नेत्यांवर विश्वास कसा ठेवायचा...

रोहित पवार पुढे म्हणाले की, महत्त्वाचं म्हणजे काही अपक्षांनी तसंच धर्मनिरपेक्ष आणि समतेचा जप करणाऱ्या काँग्रेसने भाजपाच्या उमेदवाराला स्वतःच्या तिकिटावर उभं करुन भाजपाची बी-टीम म्हणून काम करत जातीयवादी पक्षाच्या विजयाला हातभार लावला आणि लोकंही त्यांच्या या तिरक्या चालीला बळी पडले. त्यामुळं यापुढं काँग्रेसच्या जिल्ह्यातल्या नेत्यांवरही कसा विश्वास ठेवायचा, हाही प्रश्नच आहे.